12 December 2015

නිවනට ගඩොල්

"හම්මේ බස් වල ඇවිල්ලා , මගේ හොඳ පන ගියා . ඒ මදිවට මේ ගඩොල් දෙකේ බරට උරහිස්ස කකියනවා "

ආතම්මා , හෙමින් උඩු තොල පහතට හරවා , පපුවට හුලන් පිම්බේය . ඉන්පසු ඔසරි පොට ගෙන පවන් සලන්නට විය . තවම රෙදි මල්ල කරේය . 

"අම්මේ ඔය මල්ල පැත්තකින්  තියලා ඉන්න ඉතින් . "  මා සිතිවිලි,  වචන බවට හැරවුයේ අම්මාය . 

"ඔන්න උඹලා දන්න බුද්දාගමේ තරම ...ඒක , බිම තියන්න පව් .... බුදු පිළිමේ ගාවින්ම තියනවා එක පාරම "

"මොනාද ආතම්මේ මල්ලේ , නයෙක්ද ?".....පවුලේ පුංචි ඕපා දූප සොයන්නී හෙවත්  නංගි,   ආතම්මාට ලංවිය .

"මේකේ තියෙන්නේ බොහොම වටින දෙයක් දුවේ ..." ආත්තම්මා බොහොම පරිස්සමෙන් මල්ලට අත දැම්මාය 

"ආතම්මේ සීනි බනිසක් ද ..."

"සීනි බනිස් නෙමේ ආත්ම ගණනාවකට වටිනා දෙයක් "

"නාග මානික්‍යයක්ද ?"

ආතම්මා අත දමා , මහගු වස්තුව එලියට ගත්තාය 

"අයියෝ ගඩොලක් .."

"උඹ ලෑ  මහා එවුන්ට වගේම , උඹලාටත් ...."

"සෙනඟ හිටියද අම්මේ පන්සලේ  ?..."   ඒ  කතාව දුරදිග යා නොදී අම්මා වෙනතකට හැරවුවාය 

'"මං  කලින් ගිය හින්දා හොඳට ගියා , සුටුස් ගාලා ගිහින් පැන්සොන් එක අර ගෙන , දුවලා ගියා පන්සලට . ... හොඳ වෙලාවට යහපාලන ආණ්ඩුවෙන් පෙන්සෝන් වැඩිකොලේ ....රුපියල් තුන්සිය පනහක්ම වැඩියෙන් හම්බුවුනා ....එක්කෙනුකුට එක ගඩොලයි කියලා බෝඩ් එකක් ගහලා තිබ්බා ...   සල්ලි සල්ලි කියලා බලන්නේ නැතිව  ...මම එතන කොල්ලට කියලා ,      මුන්ගේ සීයටයි මටයි ගඩොල් දෙකකටම සල්ලි බැන්ඳා ... අවුරුදු පනහක්  එකට පවුල් කාපු මනුස්සයා නැතිව තනිවම කොහොමෙයි නිවන් දකින්නේ ?.."

***
"ග්ර්ර් , ෆුෆුෆු "පත්තරේ පපුව උඩ තබා ගෙන හාන්සි පුටුවේ නිදා සිටි ආතා , එක වරම ගෙරෙව්වේය 

***

"ආතම්මේ මොනවද මේ ගඩොල් ...."  පුංචි ඕපාදුප කාරී ගඩොල අතට ගෙන ඒ මේ අත කරකවමින් බලන්නීය 

"හා හා පරිස්සමෙන් ... අපේ රජමහවිහාරේ දාගැබ හදනවනේ දුවේ ... මේ ඒක හදන්න ගඩොල් .... අපේ ඇමතිතුමා , යහපාලන ආණ්ඩුවෙනුත් ලස්ස ගානක් වෙන්කරගෙනලු මේ වැඩේට .."


"හි හි ඉතින් ආතම්මා ගඩොල් ගෙදර ගෙනාපුවහම , දාගැබ හදන්නේ කොහොමද ?"

ආතම්මා වදනින් නොකීවත් , දහසක් දේ බැල්මේ ලියවුනි 

"නෑ දුවේ ආතම්මා මේ ගඩොල් ගෙදර ගෙනාවේ , හැමෝටම අත  ගස්සලා , ආපහු ගෙනියන්න ..." ආතම්මා ගේ වතේ පිළිඹි කුසල් සිතුවිලි සම්මා වාචා බවට පෙරලීමට කලින් අම්මා උත්තර බැන්දාය .

***

"...විදුලිය සම්ප්‍රේෂණය වෙන්න සන්නායකයක් අවශ්‍යයි . නිමල් විදුලි පේනුවට ඇඟිල්ල දැම්මහම , ඔහු ගේ ශරීරය විද්‍යුත් සන්නායකයක් ලෙස ක්‍රියා කරලා ..."
සිරිසේන සර් , පන්ති බාර ගුරුතුමා , 

***
කොල්ලෝ මේ පත්තරේ එලාපන් , ගඩොල් දෙක වේලෙන්න තියන්න 

ආතම්මා දිය පිරි පනිට්ටුවෙන් ගඩොල  ගත්තේ පරිස්සමටය . මා අත දිගු කලද , ඈ එය නොදැක්කා සේ ගඩොල ඈ විසින්ම ගෙන ගොස් පත්තර පිටුව මත තැබුවාය .

"අම්මේ මේ රෙද්ද හොඳද ගඩොල ඔතන්න ?.." අම්මා පැමිණ සුදු රෙදි කඩක් දිග හැරියාය . උදැහැනැක්කේ සිට ආතම්මා පිං ගඩොල් රාජයන් ඔතන්නට සුදු රෙදි කඩක් හොයන්නේ , අද අද මරු  එන බවක් කියමිනි 

අපෝ ඕක එපා , ඕක ගිය චන්දෙට දුන්න සිල් රෙද්ද . අර යටින් සුභ අනාගතයක් කියලා ගහලත් තියෙනවා. මේ යහපාලන ආණ්ඩුවේ දාගැබට ඕක හරියන්නේ නෑ ... ආතම්මා කුසළ කර්ම ගැන ගැඹුරු ධර්ම කරුණක් අපට කියා දුන්නාය 

***
"සබ්බ දානං ධම්ම දානං ජිනාති "
බුදු හාමුදුරුවෝ උපුටා දක්වමින් , රජමහා විහාරයේ නායක ලොකු හාමුදුරුවන් වහන්සේ 

***
කවුරුත් පෙනෙන්නට නැත . මම හෙමින් සැරේ ගඩොලට ලංවීමි . ගඩොල දෙඅතට ගතිමි . දිය පෙඟුණු ගඩොලේ , කර්කශ පොළොවට , මුල් වැස්ස වැටෙන විට නැගෙන සුවඳ නැගේ . මම දිගු හුස්මක් ඇද්දෙමි . ඒත් මේ පිං ගඩොලත් ඉස්සරහ තාප්පය හදන්න ගෙන ගඩොල් වැනිමය . මම එය මුවට ලංකර දිව ගෑවේ , රසයේ වත් වෙනසක් ඇත්දැයි බැලීමටය ... එකෙනෙහිම 

" මොකක්ද ඒ කරපු  අලගේත්තෙරු වැඩේ ?..."   

ඒ මොර ගෑම ආතම්මා ය . ඉන්පසු වූ සිද්ධීන් මට හරියටම මතකයක් නැතත් , මා බිය වෙන්නට ඇති බවත් , ගඩොල අත හැරෙන්නට ඇති බවත් , එය බිම වැටි කුඩු වී ඇති බවත් මට අනුමාන කළ  හැකි විය 

***
"මාත්‍රාව වැරදියට අනපුවහම , ගඩොල් වතුරට දිය වෙනවා පුංචි මහත්තයෝ . කුඩු වෙනවා . මෝඩ ගඩොල් "
- ඉස්සරහ තාප්පය බැඳී සීමන් බාස් 

***
"පව් කාර කම , පව් කාර කම ... දැන් එක ගඩොලක් කුඩු ... කොහොමෙයි දෙන්නම නිවන් දකින්නේ ?.. හ්ම්ම්ම් මොනවා කරන්නද ? උන්දැගේ පෙන්සෝන් එකෙන් උන්දැට නිවන් දකින්න කියනවා ...."


පලි : නිමිත්ත :චාමි මුහුණු පොතේ ලියු කෙටිම කෙටි ඕපා දූපයක්  ඇසුරෙන් මෙය ලියවුනි .

12 comments:

  1. නිවන් ගඩොල්, නිවන් සිමෙන්ති, අර සංස්ථා සිමෙන්ති කියන එකට වඩා අල්ලල යයි.

    ReplyDelete
    Replies
    1. සවි බල සවි ශක්තිය :)

      Delete
  2. Excellent. I think most sinhalese buddhists have become prisoners of the religion, instead of finding liberation.

    ReplyDelete
    Replies
    1. Are you a Muslim or a fake Buddhist?

      Delete
    2. He he that comment was about fake buddhists. Most buddhists I see are like the grand ma in this post.

      Delete
    3. I did not know there was a "buddhism" , I only knew only of Ashokabuddism, Olcotbuddhism, sinhalabuddism and buddhist philosophy. In my opinion Angarika Dharmapala , Olcot and such people have done something very close to what Monk Gnasaara and Samanthabadra are doing . It also appears not only does "buddhism " exist, it also has a antonym , and that is "muslim" :)

      Delete
  3. සිරසක් නැති අය නේද ඔය ගඩොල් වැඩේ මුලින් පටන් ගත්තේ.. මහා ලොකු උස්සවෙකුත් තිබ්බා මතකයි ගෝල්පීස් එකේ ඔය ගැන..

    ReplyDelete
    Replies
    1. නිවන් ගඩොල් බඳින බදාමේ මාත්‍රාව මොකක්ද දන්නේ නෑ

      Delete
  4. ගඩොල් බාගෙකට සකුර්දාගාමි ?

    ReplyDelete
    Replies
    1. නිවන් පේන දුරින් හෝල්ට් දෙකක් මෙහායින් බස්සනවා

      Delete
  5. රහයි කතාව....
    ඔක්කොටම කලින් කොක්ක ගහ ගත්තා බෝලාගේ බෝගට....

    ReplyDelete
    Replies
    1. ස්තුතියි . නැවත එන්න

      Delete

Have commented