අක්කලා නංගිලා සහ අයියලා මල්ලිලා

සිංහල බාසාවේ නංගිලා සිටිති. අක්කලාද සිටිති. අන්නලා සහ තම්බිලා සිටින්නේ දමිල බාසාවේය.
එකී සමහර අක්කලා මැදපෙරදිග නිවෙස්වල ගෘහසේවිකාවන් ලෙස සේවය කරන අතර, නංගිලා රැසක් නිදහස් වෙළෙඳ කලාපයේ   ජුකී මැෂින් සමග ඔට්ටු වෙති.  තවත් නංගිලා අක්කලා පිරිසක් යාල් පානමේ සහ වන්නියේ, සාමයේ ඵල ලැබෙන තෙක්  බලා සිටිති .

කලක් අන්නලා, අම්මාන්ලා, තම්බිලාව පෙරට දමා, දකුණේ අයියලා මල්ලිලා සමග  හරි හරියට වෙඩි  බිඳ  , වෙඩි බෙහෙත් වලට පිළිස්සුන රටක් , මිනි වලවල්  සහ ලෙයින් පෙගුනු පසක් ඉතිරි කලහ.  අවුරුදු  තිහක ඒ කාලකන්නි  සාපය නම් දැන් නිමවී ඇත .

නල්ල කියන්න හොඳ යන අර්ථයෙන්ය. නල්ලතම්බි නම් කළහ නොකර අපිව සිනහ ගන්වා, කටකතාවලට පියාපත් දී දෙහිවල පාලම උඩදී මිය ගියේය .

දැන් නම් නිතර ඇහෙන්න ලැබෙන්නේ, නිළියන්ව අනාචාරයට යොමු කරන අක්කලා ගැනය. චණ්ඩිකමින් පළාත් රන් කරන අයියලා ගැනය. මා ඔවුන් ගැන වැඩිදුර විස්තර ලියන්නට යන්නේ නැත.

කොල්ලන්ට , කෙල්ලෙකු ගැන සිතක් ගිය විට ඇය ඉබේම  "නංගි" වෙයි .  ප්‍රේමය විවාහයක් දක්වා දුරදිග ගොස් දරුවන් දෙතුන්දෙනෙකුට පසුවත්, තම ස්වාමියාට "රංජි අයියා "කියා අමතන්නියක්  මම  දනිමි .
ඒ පරණ පුරුද්දටය. ආදරයටය .

“හතළිහත්  වයසක්ද නංගි ? “ කියා ඇසු 60 වියැති  අනන්ගයෙක් ගැනද කතාවක් මතක් වෙයි.

නමුත් අයෙක්  “මල්ලි  කන  අත  ගා  ගන්න  ඕනේ  ද ” යි අසන්නේනම් ආදරයට නොවේ  

උණක්, හැදී ගෙන එනකොට කොයි කොයි අයියලාටත් කොත්තමල්ලි මතක් වෙයි . ලේසියෙන් මෙවැනි දේ මිලදී ගත නොහැකි රටක සිටින අපි, ගෙදර කොත්තමල්ලි පැකේට් දෙක තුනක් කොහොමත් තබා ගෙන සිටිමු . කොච්චර බෙහෙත් බිව්වත් ඉඟුරු කොත්තමල්ලි එකක් බොනවා වගේ නැත. බිරිඳ කියන්නේ ඒ ගතේ අමාරුවට වඩා සිතේ අමාරුවට බවය.

කෙසේ වෙතත් අයියල මල්ලිලා , අන්නලා, තම්බිලාට රජ වෙන්නට බැරිය.  D.S ගේ සිට, SWRD, JR , රනිල් සියල්ලෝම මහත්තුරුය.  දැන් ඉන්නේ අපේ මහින්ද මහත්තයාය . ප්‍රේමදාස මේ කුලකයට අයිතිවේදැයි  නැත්දැයි මට එතරම් පැහැදිලි නැත .

හැමෝට  'සහෝදරයා" යයි ඇමතු කොල්වින්, පීටර්  , එන් එම් ලාද අයියලා නොවෙති .  මගේ අත්තා නම් කිවේ ඔවුන් දවල්ට සහෝදරයෝය රෑට මහත්වරු කියාය .

 පීඩිත පන්තියේ අරගලයක් කල  කට්ටියක්ද  ඔවුන්ගේ සැබැ නායකයා එක  මහත්තයෙක්ද  නැත්නම් අනික් මහත්තයා දැයි මේ දින වල කතාවෙති . 

සිංහල, දෙමල වගේම බොහෝ ආසියානු සහ මධ්‍යතන පෙරදිග භාෂා වල, අයියලා, මල්ලිලා, අක්කලා, නංගිලා සංකල්පය තිබේ. සාමාන්‍යයෙන් වැඩිමලා ලොකු අයියා වෙන අතර, ඉන් පසු සුදු අයියලා, හෝ හීන් අයියලා පෙළ  ගැසෙති .එනමුදු බටහිර භාෂාවල ඉන්නේ  brothers ලා සහ sisters ලාය .  ඒ එම සංස්කෘතියේ සහෝදර බැඳීම්වල  ස්වභාවය නිසාද නැතිනම් එම සීතල ශුෂ්ක දේශගුණය නිසා  තම පරපුර පවත්වාගෙන යාමට, බොහෝ  දරුවන්  බිහිකීරීමටවූ නිසාදැයි කියා සිතේ . . එක රුසියානු ගැහැනියක් දරුවන් 69 ක් වැදු බව මම අන්තර්ජාලයේ දුටිමි.

නංගි පෙන්වා අක්කා දීග දීම ගැන පරණ කතාවක් ඇත.  

දැනුදු, කඩේකට  ගියත්, ආයතනයක සේවය කලත්, රාජ්‍ය පාලනය ගත්තත්, අන්තර්ජාතික දේශපාලනය ගත්තත්, බොහෝ නෝනලා මහත්වරු කරන්නේ, අපිට නංගි පෙන්වා, අක්කා දීමය  .