28 December 2016

කැප්ටන් කූල් ගේ නත්තල් ගහ සහ හීතල උඳුවපේ විකාරී හීන

නත්තල් අසිරිය වැඩිවී  , හිස බමනය වන්නට වූ පහුගිය දිනෙක, මට මතක ඇඳට වැටෙනවා පමණි . එක් වරම මම සිටියේ ගාලු මුවදොර පිටියේය . අහසේ වළාවක සේයාවක් නැත . සරුංගල් දෙක තුනක් ඔහේ පාවේ . මුහුදු සුලඟ පුරුදු ලෙසම හමයි 

පාට පාට සරමක් හැඳි , කොන්ඩේ සුදුම සුදු  මහත්තයෙක් ඈත සිටම මට අත  වැනුවේ  ඒ දෙසට එන ලෙසය . මම සෙමින් සෙමින් ඒ දෙසට ඇවිදින්නට වුයෙමි . ලං ලං වත්ම මේ සුපුරුදු මුහුණ මට හඳුනා ගත හැකි විය .


"හව් ඊ ඊ ඊ ස්  දැට් ට් ට්  ට් " ???!!!!  

එක වරම ඔහු මහ හඬින් කෑ ගසන්නට වුයේය .  මම අන්දුන් කුන්දුන් වුයෙමි . ඒ සමගම ඔහුගේ ඇඟිල්ල දිගු වූ දෙසට මට බැලුනේ ඉබේටමය . මොකක්දෝ අහස උසට නැගුනු දැවැන්ත සැකිලි ඉදිකිරීමකි .

මොකක්ද කිව්වේ ?

නෑ  මම ඇහුවේ හව් ඊස් දැට් කියලා ?

ඇත්තටම ඒ මොකක්ද 

ඇයි ඔහේ දැක්කේ නැද්ද පත්තර වල , මේ අපේ ලෝකේ ලොකුම නත්තල් ගහ 

ආ මේ ඒකද  , මම ෆේස් බුක් එකේ නම් දැක්කා මේකට එක එක ඒවා කියලා තිබ්බා 

ඔය අවලම් කොල්ලෝ අල්ලලා කටවල් තලන් ... නෑ  මම කිව්වේ ඒ දරුවන්ට හොඳ නරක කියා දෙන්න ඕනේ 

හැබැයි කැප්ටන් , මේක නිකන් නත්තල් ගහක් කියලා පෙනෙන්නේ නෑ නේ ..නිකන් රොකට් එකක් වගේ , නිකන් කොපුවක් දාපු පුරුස ..

මේ ඕයි , තමුසෙට ඉමජිනේෂන් එකක් නැද්ද .. මේක නත්තල් ගහක් කියලා හිතාගෙන බලනවා , එතකොට ඒ වගේ පේනවා . අනික රෑට බලුබ් පත්තු කරපුවහම හරි 

සොරි කැප්ටන් , ඇත්තටම එහෙම බලපුවහම නම් , නිකන් ඒ වගේ වගේ පේනවා තමා .

අන්න ඒකනේ , දැන් ඔය ක්‍රමේ අනිත් දේවල් දිහා බලන්නත් පාවිච්චි කරනවා 

හැම දෙයක් දිහාම ඔහොම බලන්න පුලුවන්ද 

එහෙනං , ඔය වෙනස , නීතියේ ස්වාධීනත්වය , යහපාලනය , දුෂණය පිටුදැකීම ඔය ඕන එකකට ඔය ක්‍රමේ පාවිච්චි කරන්න පුළුවන් 

කැප්ටන් ඒක නෙමෙයි ඔය වැඩේට කට්ටිය මුලින් විරුද්ධ වුනා නේද ?

කව්ද 

ඇයි අර කාදිනල් තුමා 

පිස්සුද ..මේ හැම දෙයක්ම වගේ,  මේකත් මේ මාධ්‍ය වරදවා පතුරවා හැරපු ප්‍රවෘත්තියක් නේ .. මේකනේ උනේ .
මේ වැඩේට ප්‍රචාරණයක් දෙන්න අපි සංගීතයක් ඕගනයිස් කළා .  නත්තලටත් හරියන්න අපි සංගීතය සපයන්න හයර් කලේ "කාඩිනල් ස් අවුට් බර්ස්ට් " බෑන්ඩ් ඒක  ... ඕක වැරදිලා රිපෝර්ට් කරලා තමයි මේ අලකලංචිය වුනේ 

නෑ  ....මුන්ව උල තියන්න එපා යෑ 


ඉවසලා ඉන්න .. ළඟදීම. ළඟදීම .

ඒත් කැප්ටන් මේ වගේ වැඩ නිසා මිනිස්සු ආණ්ඩුවට බනින්න ගන්නවනේ 

ඉතින් හොඳයිනේ 

ඒ කිව්වේ ..මට තේරුනේ නෑ 

අපේ නායකතුමා හැම තිස්සෙම කියන්නේ , ගොඩක් අයට ඔලුවක් තියෙනවා කියලා මතක් වෙන්නේ හිසරදයක් හැදුනමයි කියලා .. ඉතින් මිනිස්සු බැන්නේ නැත්තනම් උන්ටයි අපිටයි ඔක්කොටම ආණ්ඩුවක් තියෙනවා කියලා අමතක වෙයි 

ඒකත් එහෙමද ... ඒක  නෙමෙයි කැප්ටන් ඇත්තටම ඇයි මේ නත්තල් ගහ හැදුවේ ?

අයිසේ ,  අපේ ගෙවල් ගාව ඉස්සර ලංසි පවුලක් හිටියා බොහොම අහිංසක විදියට ජීවත් වුනු.  මිනිහාට රස්සාවක් නෑ . නෝනා මැහුමක් කරලා, කේක්  ගෙඩියක් හදලා තමා ගාණක් හොයා ගත්තේ .   . ඉතින් නත්තලට සාලේ තීන්ත ටිකක් ගා ගන්න එහෙම වත්කමක් තිබ්බේ නෑ . .. ඉතින් ඒ ගෙදර නත්තලට කලේ බිත්ති වල කඩතොළු වැහෙන්න ක්රෝටන් පැල තියන එක ... 

නෑ  කැප්ටන් මම ඇහුවේ මේ නත්තල් ගහ ගැන 

ලොකුම කඩතොළු වැහෙන්න තමා නත්තල් ගහ සෙට් කලේ 

දැන් තේරුනා ..ඇත්ත නේන්නම් , ලෝකේ ලොකුම මගඩි  වහන්න , හිල්  වහන්න . ලෝකේ ලොකුම නත්තල් ගහම හදන්න වෙනවා 

මොකක්ද කිව්වේ ?

නෑ කැප්ටන්.. දැන් මේකෙන් පස්සේ මොකක්ද කරන්න බලාපොරොත්තු වෙන්නේ ?

අපි මේකෙන් අරින්නේ නෑ .. අලුත් අවුරුද්දට චීනෙන් හාල් ගෙනත් හදනවා ලෝකේ ලොකුම කිරිබත , වෙසක් එකට ලෝකේ ලොකුම බෝ ගහ ,  රාමසාන් එකට ලෝකේ ලොකුම වටලප්පම ....ඊට පස්සේ අපි ජනතාවගෙන් අහනවා ...... (රහසින් මෙන් ) ..ඔබට ශතුටුයිද දැන් ?

කැප්ටන්,  ඔයිට වඩා නරකද .....ලෝකේ ලොකුම එල්ලුම් ගහ හදාගෙන කට්ටියම එල්ලුනා නම් 


හැ හ් ..

කැප්ටන් .. හව් ඊඊඊ ස්  දෑ දෑ දෑ ට් !!!!???

එකෙනෙහිම කැප්ටන් සරම කැහැ පට ගසාගෙන , ගොටයිම්බරයා වෙතට වන්  ජයසේනයා මෙන්,  මා වෙතට කඩා පැන්නේය . මා උරහිසෙන් තදින් අල්ලා සොලවන්න ට විය 

"මේ මේ මේ නැගිටිනවා .. බොන්න බැරි ගානට බී ගන්නවා ඊට පස්සේ රෑ තිස්සේ කෑ ගහන්න ගන්නවා .... ළමයිනුත් බය වෙනවා "

මා බිරිඳ, ඈ  ආදරණීය වදනින්  , මා සිහින ලොවින්  මුදාගත්තායින් , යාන්තං ගුටි නොකා බේරුනෙමි .

14 December 2016

ඇසිලියාගේ සාත්තරේ (විකාශනය), තිත් සහ ඉරි ප්‍රහේලිකා සහ මෝඩයන්ට ජෝක් පත්තියන් වීම

කලකට පෙර මම  ,  හැම දෙයටම රෙද්ද කඩපු  ඇසිලින් ගැන මේ අඩවියේ ලියුවෙමි .  ඔබ කිහිප දෙනෙකුට හෝ එය මතක ඇති https://pinchpoints.blogspot.hk/2012/06/blog-post.htm.

ඇසිලින් රැකියාවක් හැටියට කලේ ස්වයං ව්‍යාපාරයකි . කොටින්ම ඇගේ  මුළු පවුලම පාහේ මේ ව්‍යාපාරයේ යෙදුනහ. 
දෙටු පුත්‍රයා නිෂ්පාදන අංශයද , කනිටු පුත්‍රයා බෝතල් කිරීමේ අංශයද බාරව සිටි අතර , වෙළඳ අංශය බාරව සිටියේ ඇසිලියා ය . ඇගේ  සැමියා , වැලිකඩ බෝඩිමේ වැඩි කාලයක් ගත කළ  අතර , නිවාඩුවට ගෙදර විත් සිටින කාලයේ රස පරීක්ෂක ලෙස කටයුතු කළේය .

මීට අමතරව ඇගේ  අලෙවි හලේ නිරතුරු ගැවසුණු පාරිභෝගිකයන් කිහිප දෙනෙකි . ජෙමා ඒ අතරින් එකෙකි . ඔහු ගැන විස්තර කරනවා නම් , ඔහු වචනයේ පරිසමාප්තයෙන්ම ජෙමෙක් ම විය 

ඉඳ හිට , ඇගේ  තිප්පොල පොලිසියෙන් වටලන්නේය . පොලිස් ජීප් එක වැයික්කියට ඇතුළු වූ වහාම ආරංචිය ලැබෙන්නේය . වැඩිපුර බූලි  දෙක තුන ඒ ලැබෙන ඉඩ කඩින් සැඟ වෙන්නේ , එඬරු යායේය . පොලිසියේ මහත්තුරු වත්තට ඇතුළු වූ වහාම නිසැකයෙන්ම සිදුවන සිද්ධීන් තුනක් ඇත  . මුලින්ම ඇසිලියා රෙද්ද කඩා දමන්නේය , ඉන්පසු ජෙමා හූ  කියන්නට ගන්නේය , ඉන්පසු කවුරුන් හෝ ජෙමාගේ  සරමත් කඩා දමන්නේය . පොලිස් නිලධාරීන් මේ දර්ශනය මගහරින්නට එහේ  මෙහෙ දුවති 

මේ ජරමර ඇසිල්ලේ , බොහෝ දෙනෙක් මාරුවෙන්නෝය .

අහුවෙන දෙතුන් දෙනාට පොළී  සමග පොලිස් ගුටි ලැබුනද , නඩු සාක්කි නැති බැවින්  ටික දිනකින් ලාබෙට නිදහස් වෙන්නොය .සිද්ධිය එසේ සිදුවේ .

ඇසිලියාගේ මේ සාත්තරේ සමාජයේ විකාශනය වී ඇති සෙයකි .

සුපර්ස්ටාර් සංජන්ලාගේ   අනිත් එවුන් ගේ රෙද්ද කැඩීමේ සිට , පාර්ලිමේන්තුවේ දී ජෙමා ලාගේ රෙදි කඩා  පුරුෂ ලක්ෂණ පෙන්වීමේ සිට, කැප්ටන් හැඩොක් ලා , ටින්ටින් ලාට කණට  ගසා රෙද්ද කඩා දැමීම දක්වාම ඇත්තේ ඇසිලියාගේ  මේ සාත්තරේ ම නොවේදැයි මට විටක  සිතේ . 

රෙදි කැඩෙ , හෙළුව පෙනේ  , හූ කියවේ , බඩු බූලී පිටින් මාරුවේ .

***
පොඩි කාලේ , මම කැමතිම ප්‍රහේලිකා වර්ගයක් වුයේ තිත් යා කර චිත්‍රයක් මතුකර ගැනීමේ ප්‍රහේලිකා ය . තිත් ටික විසඳන්නාට ලැබේ , නමුත් ඒවා යා කරන ඉරි තමන් විසින් විසඳා ගත යුතුය . මුළු චිත්‍රය මතුකර ගත හැක්කේ තිත් දෙස බලා සිටීමෙන් නොව සම්බන්ධතා කියවීමෙනි 

 ලංකාවේ දේශපාලන යයි බොහෝ විට පෙනෙන්නේ , දේශපාලනය හා සම්බන්ධ සිද්ධීන් ය . මේවා කියවීමෙන් , දේශපාලනය කියවිය නොහැක . 

වර්ජන ,  වොයිස් කට් පමණක් නොව , බල පෙරලි හා මතුවී එන  නායකයින්ද මේ තිත් ඝනයට අයත්ය . 

සිද්ධීන් කියවීමේදී , ඒවා සම්බන්ධ  පුරුක් නොපෙනී යයි .  නමුත් දේශපාලනය කියවිය හැක්කේ පුරුක් කියවීමෙනි . 

එසේ සිතන්නට වූ කළ  මේ ගොන් ජෝක් වල භයානක කම මෙන්ම , ඒ ජෝකර් ලා ගේ භූමිකාවද පෙනෙන්නට ගනී 

***

මෝඩයෙක් එකම විහිලුවට තෙවරක් සිනාසෙන්නේලු .

මුලින්ම  අනෙකුන් සිනාවෙන නිසාද,  දෙවනුව විහිලුව තේරී ද, තෙවැනුව මුලින් බොරුවට සිනහා වූ බව සිහි වීද ඔහු සිනහා වේලු . නමුත් අන්තිමට ඇඬේන විහිලුත් ඇති බව මට සිතේ 

30 November 2016

ගෙදර යාමට පරක්කු වූ එළවුළු මල්ල සහ මේසය මත ලතැවෙන දොඩම් ගෙඩි දෙක (කවිද මන්දා )


පෙර කියවීම :මෙය ගෙදර යාමට පරක්කු වූ එළවුළු මල්ලක් සහ මේසයක් මත ලතැවෙන දොඩම් ගෙඩි දෙකක් පිලිබඳ කතාවකි 

ට්ක්රාස් ගා ගෙන 
වීල් එක ඉගිලුනේ  දුම් දා ගෙන 


මුඩුක්කු අයිනෙන් 
ගලයිද මොන ගංගා 
කුණු ඇලක් මිස 
ගොර ගොර ගා 
මොන සාරි ගප්පිද 
ඉස්ගෙඩි මිස 
කකුල් එනකං ලතැවෙන 

දොර පියන ඇරෙන්නේ 
ක්රීස් ගාගෙන 
ඇතුළට 
වොට් හතළිහේ බලුබ් එකක් 
විරිතන්නේ
එල්ලී වයර් එකක  
කළුවරට 
ලෑම්ප් ශේඩ් මොකටෑ 
මේ වගේ තැන් වලට 

ඇඳි  සළු උනන්නේ 
ඈ 
පිටිපස්ස හැරිලා 
හරියට 
ලැජ්ජාව රකින්නැහේ 
ඩිංගිත්තකට 

ආපු එකා 
සිලි මල්ල තියන්නේ 
ඇඳ ලඟම 
කරල් දෙකෙයි මුරුංගා 
තක්කාලි ගෙඩියෙයි 
වැටකොළු දෙසිය පනහෙයි 
වැඩි පරිස්සමට 

මේසේ  උඩ 
දිලිසෙන්නේ 
දොඩම් ගෙඩි දෙකක් 
 ගෙඩියක් 
පැපොල්
බලෙන් වගේ  ඉදවුණු 
අත ගාන්නේ ආසාවට 
පොඩි එකීත් 
කන්න ආසයි 
දොඩම් නම් 

"තැලෙයි .. පරිස්සමෙන් "  
ගත්තේ  
ඉස්පිරිතාලේට ගෙනියන්න හෙට
ටිකක් අමාරුයි එයාට 
 යන්න නම් උදේ 
ලෙඩ්ඩු  බලන වෙලාවට 
අල්ලන්න ඕනේ 
පහමාරේ බස් එක 

ඉක්මන් කරමු ද 
ඉතින් 

26 November 2016

ඉන්ටපෝල් එකට ආ කෝල් එක

මෙය සමාන්තර විශ්වයේ කතාවකි .

වෙලාව මාධ්යන දොළහ පසුවී විනාඩි තිහක් වුවා පමණි . පොලිසියෙන් පුවත් අවසන් විය . 

ට්රීන්  ට්රීන් ගා දුරකථනය නාද වෙන විට සාජන්ට් ලන්තපෝල් සිටියේ , ඕ  අයි සී පුටුවේ වාඩිවී  මේසය මත කකුල් දෙක තබා ගෙන , ගීතයක් මුමුනමිනි .  ඕ  අයි සී දවල් කෑමට ගෙදර ගොසින්ය .

සිංදුව පිටින්ම ඔහු දුරකථනය එසවීය 
"..වතුර නාලා , තෙත කොන්ඩේ කඩාලා , ඉඟට මල් ....හෙලෝ , ඉන්ට පෝල් පොලිස් ඉස්ටේෂන් , සාජන්ට් ලන්ත පෝල්  ඉස්පීකින්ග් .. අමතන්න .."

හෙලෝ ඕ  අයි සී ඉන්නවද 

ඉන්නවනම් පෝන්  එක ගන්නවනේ , මම තමයි ලොක්කා අයිසේ කියනවා මොකද ප්රශ්නේ "

මම මේ සමාන්තර ලංකාවෙන් කතාකරන්නේ 

ඔව් කියන්න මොනවද කෙරෙන්න ඕනේ 

අපේ රටේ දරුණු අපරාධ කාරයෙක් පැනලා ඇවිල්ලා ඉන්නවා ඌව අල්ල ගන්න උදව්වක් ඕනේ 

හරි හරි අපි ඉන්නේ ඒවාට තමයි ...සාජන්ට් ජීප් එක ලැස්ති කරන්න ... අපි දැන් එනවා 

නෑ  නෑ  .. එහෙම නෙමෙයි .. ඌ මෙහෙන් පැනලා ඉන්නේ .. ඒක  නිසා එන්න අවශ්ය නෑ 

ඔව් ..කොහොමත් එන්න වෙන්නේ නෑ  .. මොකද මමනේ සාජන්ට් , මම මෙතන පෝන්  එකේ, ඉතින් ජීප් එක ලෑස්ති කරන්න එකෙක් නෑ  ..මූ භයානක අපරාධ කාරයෙක් කිව්වා නේද ?

ඔව් ඔව් .. ත්රස්තවාදියෙක් 

හරි හරි මම දැක්කා  නිව්ස් වල ...අර ඔහේලාගේ මහා බැංකුව හොරකම් කරපු එකාද 

නෑ  නෑ  .. ඌ මෙහෙ අපි ළඟ ඉන්නවා 

එහෙනම් අර කලින් පිටරට සේප්පුවල සල්ලි හංගපු එකෙක්ද 

නෑ  නෑ  උනුත් ඉන්නවා .. උන්ත් එක්ක අපි අල්ලන සෙල්ලම් කරනවා නේ .. මූ ද්වෙශමාන  අසත්ය ආරංචි පතුරන එකෙක් 

ආ ඔව් ඔව් ඉඳලා හිටලා ඔහේලාගේ පාර්ලිමන්ට් එකේ වොයිස් කට් , එතකොට කැබිනට් මාධ්ය ප්රකාශන බලන කොට මම දැකලා තියෙනවා එහෙම උන්ව 

නෑ  නෑ  සාජන්ට්  මූ  පචෝරිස් කෙනෙක් 

එහෙනම් උගේ පුතා වෙන්න ඇති ..ඕකා කිව්වේ ඇස් දෙකෙන් දැක්ක කියලා අරවා මෙව්වා ..

නෑ නෑ මූ  මාධ්යකාරයෙක් ...මූ අපිට අවාසි වෙන බොරු කියන්නේ 

ආ හරි හරි මට තේරුනා ... ඒත්  ඔහේ මාධ්ය නිදහසද මොකක්ද තියෙනවා නේද 

තියෙනවා ...ඒ වුනාට අධිකරණය ස්වාධීනයි නේ....අනෙක ඉස්සර ආණ්ඩුවේ සුදු වෑන් , සුදු වෑන් , සුදු වෑන්

මට එක හරියට තේරුනේ නෑ .. කමක් නෑ  .. හැබැයි ඉතින් මේ වගේ වැඩ වලට ඉතින් කල් යනවා 

එහෙම බෑ  .. අපිට පැරලල් පෙන්නන්න ඇඩ් ඕනේ නැත්නම් මිනිස්සු මේන් ප්රෝග්රෑම් එක  බලන්න ගන්නවා 

ඒකත්  එහෙමද ...මේ මහත්මයා ඇහුවට තරහ වෙන්න එපා .. සාමාන්යයෙන් අපිට කතාකරන්නේ රටවල්වල පොලිස්පතිලානේ , ඔහේ එහෙම කෙනෙක් නැද්ද ?

ඉන්නවා ඉන්නවා , හැබැයි මේ දවස් වල එයාට හරියට වැඩ ,  අයවැය ගැන එන ප්රශ්න වලට මුදල් ඇමතිතුමාට උපදෙස් දෙනවා 

හහ් ..මාර රටක් නේ ..එහෙනම් තියන්නම් ...මොකක් හරි හෝඩුවාවක් හම්බු උනොත් අපිට  අමතන්න... අපරාධ කාරයාව දැක්කොත් අල්ලලා ගහක බැඳලා  අපිට කතාකරන්න 

එතකොට අපිද අල්ලන්න ඕනේ 

ඉන්ටපොල් උනත් අපිත් පොලිසියක් නේ ...හරි එහෙනම් තිබ්බා ....අං ගනී කොහෙද යන්නේ නිතඹ සලලා ..ව්ව්ව් වතුර නාලා 

19 November 2016

ඩිංගියාට දෙන දඬුවම

නඩුකාරයා : යුෂ්මතාගේ නම මොකද්ද ?

චුදිතයා : ඩිංගියා හාන්දුරුවනේ 

 ඔබේ රැකියාව 

හාන්දුරුවනේ , කනත්තේ වලවල් කපන්නේ මම 

ඔබට විරුද්ධව තිබෙන පැමිණිල්ල ඔබට වැටහෙනවාද 

හාන්දුරුවනේ 
නිච්චියක් නෑ හරියටම 
 පොලිසියේ ජීප් එකේ දාං ගියේ 
උඹට හොඳ වැඩක් කොරන්නං 
කිය කියා 
රාළහාමිලා 

පොලිසියේදී 
කූඩුවේ එල්ලලා 
ගැහුවේ 
සාජන්ට් මහත්තයා 
කියාපිය ඇත්ත 
නැත්නම් බලා ගනිපිය 
කිය කියා 

පැමිණිල්ල වෙනුවෙන් පැමිණි පොලිස් නීතිඥ : පොලීසිය පාවිච්චි කලේ අවම බලය ස්වාමීනි 


(නඩු කරු පොලිස් නීතිඥ දෙස බලා )  හරි හරි , .. යුෂ්මතා ට විරුද්ධව තියෙන්නේ මිනීමැරුම් චෝදනාවක් 

අනේ හාන්දුරුවනේ මම කලේ මගේ රස්සාව 

ඔබට මතකද ඒ රෑ වෙච්ච සිදුවීම් 

අමාවක රෑ අහසේ 
තාරුකා නිදහසේ 
දෙගොඩහරි යාමේ 
මං හිටියේ  කාමරේ 

දොරට ගැහුවේ මහත්තෙක්  
පිස්තෝල මිටෙන් 
බෙල්ලෙන් ඇදගෙන මාව 
දා ගෙන ජීප් එකේ 
අරන් ගියේ   කනත්තට .

කපාපිය වලක් . 
මම කැපුවා වලක් 
 කරපිය ඉක්මන්  
 මම කළා ඉක්මන් 

වලට ගෙනත් දැම්මේ මිනියක් 
හතර ගාතයෙන් එල්ලන් 
යන්න කලින් මහත්තුරුන් 
වහපිය වළ දාලා පස්  

ඊට පස්සේ මහත්තුරු ගියා 

ඊට පස්සේ ?

මම පස් දාන්න ඉස්සෙල්ලා පොඩ්ඩක් ලංවෙලා බැලුවා . තාම හුස්ම වැටෙනවා . අර මහත්තුරුන්ට මරලා යන්න අමතක වෙලා . මට පණපිටින් මිනිහෙක් වලලන්න බෑ නේ හාන්දුරුවනේ . ඉතින් මම දුන්නා උදලු මිට තදින් බදලා බෙල්ල හරහා .

ඔබ වරද පිලිගන්නවා ඒ කියන්නේ 


හාන්දුරුවනේ , වරද ?

වලේ හිටපු මිනිහා මැරිලා නෙමෙයි හිටියේ 

නෑ  හාන්දුරුවනේ 

ඔබ උදැල්ලෙන් ගැහුවා

ඔව් හාන්දුරුවනේ    .....

හාන්දුරුවනේ ..

ඔව් 

මම හිරේ යයිද ?

ඒක මම නෙමෙයි තීරණය කරන්නේ .. මොකෝ නීතිය  ස්වාධීනයි නේ ....මේ ජනතා ජූරිය  තමා තීරණය කරන්නේ 



පලි :මෙය පහුගිය කාලයක කතාවක් නොවේ . මෙය අපේ වත්මනයි , අනාගතයයි . බාගෙට මරණ ලද නීතිය , හර  පද්ධති , ආර්ථිකය මෙන්ම , අපේ රටේ අනාගතයද  මහත්තුරු වළ තුළට  ගෙනත් දමති . නමුත් වළලන්න වෙන්නේ බොහෝ විට ඩිංගි යන්ටය . ඩිංගි යන අල්ලා , දෙකක් ඇන ඇත්ත එළිකර ගන්නේ නීතියයි ... නමුත් දඬුවම් දීමේ වගකීම අත  ඇරෙන්නේ ජනතාව කර මතටය  

13 November 2016

අත්තලා ගේ ආයෝජන , අප්පලා ගේ මෝඩ කම් සහ අපි

මගේ ජීවිතයට බලපාන්නේ , මගේ සීයාගේ ආයෝජනයන් සහ මගේ පියා ගේ මෝඩ කම් යයි ,  දිනක් මා සිඳුවා,  කිව්වේ අප්පච්චිමය. 

ඔහු කියන්නට උත්සහ කලේ, අපි ආයෝජනය කළ  යුත්තේ පරම්පරා දෙකකට එහා ගැන සිතා බවය . අනෙක් අතට අපේ වැරදි තීරණ බලපාන්නේ , අපිටත් වඩා අපේ දරුවන්ට බවය . 

මේ කියන ආයෝජන මුදල්  පිළිබඳව නොවීය . සීයා කෙනෙක් , මුණුපුරාට කෑමට අඹ ගසක් සිටවීම ගැන කතාවක් මා කුඩා කළ නිරතුරුව ඇසුණි . මේ කියන්නේ ඒවැනි ආයෝජනයන් ගැනය 

එතනින්  එහාට ගැන සිතන්නට වූ කළ  , මේ කියන්නේ සංකල්පමය ආයෝජනද  ගැනය . ඕනෑම සංකල්පයක් , එය බිහිවෙන පරම්පරාවට විහිලුවකි විකාරයකි . ඉන් නොසැලී රැකුනොත් එය ඉන් පසු පරම්පරාවට එය විකල්ප මතයකි . එය හොඳින් ඇවිලෙන්න ගන්නේ තෙවැනි  පරම්පරාව තුලය .

උදාහරණයක් ලෙස අපි සිහින දකින සහජීවනය සහ ජාතිකත්වය අතර නියම මාත්‍රාවට මුසු වූ චින්තනය , අපේ ජීවිත කාලය තුළ  ලැබෙන්නේ නැත . අපේ පරම්පරාවේ හිත්  වල ඇති යුද්ධයේ තුවාල පුර්ණව වේලේන්නේ  නැත .  අම්මා අප්පා නැතිවු දරුවන්ගේ දුක  ඊළඟ පරම්පරාවේ ද යම් දුරකට කිඳා  බසිනු ඇත . ඒත් ඉන්පසු පරම්පරාවට ඒ බර නැත . ඉතින් ඉතිහාසයට නිවහල්ව සිතිය හැකි වනු ඇත . නමුත් එය ඉබේ සිදු නොවනු ඇත, ඒ සඳහා ආයෝජනය පටන් ගත යුත්තේ අපය . එය කළ  යුත්තේ තැන්පතුව කල් පිරෙන්නේ තව පරම්පරා දෙකකින් බව දැන දැන  මය .

අපි පතන යහ සමාජය , පරම්පරා දෙකකට අතික්රමනය කර ඒ සඳහා අවැසි වටිනාකම් වල බීජ දැන්මම රෝපණය කළ  යුතුය ... එතකොට යමෙක් කියාවී  "ඕක තමයි දිගු කාලීන  ජාතික ප්‍රතිපත්තියක් ඕනේ කියන්නේ " ...කොහෙද මේ පක්ෂ ක්‍රමේ නිසා .....එහෙමද ?

වටිනාකම් වැඩෙන්නේ ප්‍රවාද මතය . ඉන්පසු පවතින්නේ ඒවා සම්මතයන් වීම මතය . දැන් අපි කළ යුත්තේ ඒ ප්‍රවාද තැනීමය . අපේ ප්‍රවාද කෙතරම් යාවත් කාලිනද ?  

බොරු නොකියන වීර කතා , හොරකම් කළ  රජවරුන් ජනතාව විසින් එලවන වීර කතා නොමැත . අපේ වීර කතාවල සහජීවනය , සමගිය, එකමුතුබව ගැන කියවෙන කතා කීයක් ඇත්ද . ඇත්තේ එක් වීරයෙක් , මුළු රටක් බේරා ගන්නා කතා නොවේද .

ඉතින් අපිත්  අත්  බැඳ ගෙන දියසේන එනතෙක් බලා සිටිමු ද .. 


05 November 2016

බයිස්cope 1 හෙවත් හොරා පොලිස් සහ හොර පොලිස් (චිත්‍රපට විචාරයක් )

මේ දිනවල අති සාර්ථක ලෙස, දියවන්නා ශ්‍රී ජයවර්ධන පුර, සිරිකොත පිටකෝට්ටේ , රත්තා පාගොඩ , එබවි මැදමුලන , මයිත්‍රී පොලොන්නරුව ඇතුළු දිවයින පුරා සිනමා හල රැසක  තිරගත වෙන විනෝදාත්මක චිත්‍රපටයකි  "බයිස්cope 1 - හොරා පොලිස් සහ හොර පොලිස් ". 
මේ ගැන අපි චිත්‍රපටය නැරඹු කිහිපදෙනෙක් ගේ අදහස් විමසුවෙමු .

කෝට්ටේ අලි ජේමිස් මහතා 

මේක විනෝදාත්මක කතාවක් කිව්වට වීර කතාවක් කියලයි මට හිතුනේ  . අපේ අජී  , මෙහෙම එන්නේ ..ඇවිල්ලා දෙනවා ඇට්ටි හැලෙන්න ටෝකක්.. මයිල් කෙලින් වෙනවා ..."අයුක්තිය අසාධාරණය පිරුණු ලෝකෙක ..යුක්තිය සාධාරණය වෙනුවෙන් සටන් කරන කොල්ලෙක් මං ....අවමන් කරන්න එපා හදවත වාවන්නේ නෑ .." කියද්දී  පාහ් ලොක්කා....ඇට්ටින් කියන්නේ මේවනේ ..

කිල්ලපනේ නන්දාවතී මහත්මිය 

අපි නම් පවුල පිටින්ම ගිහින් බැලුවේ . මොකද අර ට්‍රේලර් එකේ තිබ්බනේ , අධ්‍යාපනය ලබන සිසුන්ට , වෘත්තිකයන්ට එහෙම පරිස්සමෙන් පරිශීලනය කළ යුතු කෘතියක් කියලා 

ඇත්තටම හොඳ චිත්‍රපටියක් . හදවතටම දැනුනා . අපිට ජීවිතේ තියෙන ප්‍රශ්න පොඩ්ඩකට අමතක කරන්න මේ වගේ චිත්‍රපටි වටිනවා ... අර එක සීන් එකක හඳුන් , "අජී  ඔයා ඇයි  මේ තරම් බොරු කියන්නේ ...මගේ ඇස්  දෙක බලාගෙන කියන්න පුළුවන් නම් ..." කියනකොට ඇත්තටම මට ඇඬුනා ..


ගාල්ලේ සුමිත් මහතා 

රඟපෑම් නම් ඔක්කොම වගේ හොඳයි කියතැකි .  ඒත් මුලින් ලිස්ට් එකේ නම් තිබ්බට , සංජන් හිටියේ නෑ  කියන්නේ . එඩිටින් වලදී කපලද මන්දා ..මම නම් රස වින්දේ මේ චිත්‍රපටයේ ගීත . අර හඳුනුයි අජීයි  කියන " දෑසින් දෑස බලන් කියන්න රත්තරන් " සිංදුව  එතකොට අර කට්ටියම කියන " ඇල්ලුවට හපන්න පුලුවන්ද ?" සමුහ ගීතය හරිම ලස්සනයි කියන්නේ . හැබැයි ඉන්ටබල් එකේ කැන්ටිමට ගියාම , මෙන්න බොලේ අයිස්චොක් එකටයි කඩල පැකට් එකටයි වැට්  ගහලා කියන්නේ  


ප්‍රවීණ සිනමා විචාරක සිත්තර විස්තර මහතා 


මම මේ චිත්‍රපටිය දෙවරක් නැරඹුවා . මොකද මට ෂෝ දෙකකට නොමිලේ ටිකට් ලැබුන නිසා . 

මෙය ටිකක් අමුතු චිත්‍රපටියක් . කතාව හොරකමක් ගැන . හැබැයි අන්තිමේදී කවුද හොරා කියලා හිතා ගන්න බෑ  . 

අනික මේ චිත්‍රපටියේ අධ්‍යක්ෂක අඥාතයි , එහෙම චිත්‍රපටි සාමන්‍යයෙන්  හැදෙන්නේ නෑ  . නිෂ්පාදනයත් , මහජන බදු මුදලින් නිෂ්පාදන පිරිවැය පියවන ලදී කියලා තමා තියෙන්නේ .

මුලින්ම චිත්‍රපටයේ වීරයා වෙන්නේ ඉන්ස්පෙක්ටර් හඳුන් . ඔහු මේ හොරකමේ සුළ මුළ  හොයන්න යනකොට , ඔහුත් එක්ක සටනට එනවා භයානක දාමරික කල්ලියක් . පුට් නෝට් කල්ලිය . අන්තිමේදී ඔහු "එම්බල සතුර ගනු සටන එනු කඩුවට " කියලා ගේමට බහිනවා ... ටිකකින්  පුට් නෝට්  කල්ලියේ අය "අඩෝ හොර ඉන්ස්පෙක්ටර් හොරු ආරක්ෂා කරන්න එපා " කියාගෙන එනකොට , ප්‍රේක්ෂකයාට හිතෙනවා , අම්මපා ඉන්ස්පෙක්ටර් නීතිය  නවලා ගහන්න හදන හොර පොලිස් කෙනෙක් ද කියලා  ... කතාවේ ට්විස්ට් ගොඩක් තියෙනවා .. 
පස්සේ හඳුන් සාක්කි ෆයිලුත් අරන් පැනලා දුවනවා . ඕඩියන්ස් එක චියර් කරනවා .
 පුට් නොට් කල්ලියත් ලණු  අරගෙන එල්ලන්න හොරු හොයනවා .... ගැලරියෙන් විසිල් වදිනවා ...පොලීසියේ ඉතුරු කට්ටියත් හොරු හොයන්න යනවා . .. මහා හොරා සිංගප්පුරු චාලිව , මාලඹත් හොයනවා කඩුවෙලත් හොයනවා .

හැබැයි මුළු චිත්‍රපටය පුරාවටම හොරා නෑ . දුෂ්ටයෝ නෑ  .. ඔක්කොම වීරයෝ විතරයි . වීරයෝ වීරයෝ ගහන ගන්නවා ... කොමික් කෑලි  දානවා ...සින්දු කියනවා ...අන්තිමටම ක්ලෝස් අප්  ෂොට් කීපයක් තියෙනවා .

හඳුන්  ඇවිත් කියනවා , කවුරු මොනවා කිව්වත් මම තනියම හොරා අල්ලලා ගස් බැන්දා , දැන් ඇවිත් දඬුවම් දෙන එකයි තියෙන්නේ කියලා ..... එතකොට පුට් නෝට්  කට්ටිය කියනවා  "ලාවට ගහපු ගැටේ තද කලේ අපි කියලා "

මෙන්න බොලේ සිංගප්පුරු චාලි එනවා , ඇවිත් කියනවා " මම හොරෙක් නෙමෙයි , මෙන්න මම ආවා , හොරෙක් නම් එයිද කියලා " 

ප්‍රේක්ෂකයා මඥ්ඥන්  වෙනවා ...ඔලුව පැටලිලා තමයි ගෙදර යන්නේ . හැබැයි  මේ කතාව ඉවර වෙච්ච් විදියටනම් අනිවාර්යයෙන්ම දෙවෙනි කොටස ළඟ එනවාය 



පලි: මෙය මට නම් බයිස්cope  එකක්ම විය . අර ඉගන ගන්න අයට මේක පරිශීලනය කරන්න කීවාම , COPE  එකේ පරමාර්ථය , ඉස්කෝල වල පෙළ පොත් සැදීමද කියා මට පැටලුණි . දැන්ම ඔක්කොම එවුන් කියන්නේ . මෙන්න හොරු , දැන් පුළුවන් දෙයක් කරපන් කියා අපටය . ඇඟට හොඳයි කියා , පෘට් සැලඩ් එකට සුදුලුනු දැමුවා සේ පුට් නෝට්  දමා ඇත . ගුණය වැඩි වෙන බවට තර්ක කලද , නීතී විශාරදයෙක් නොවන මට නම් හිතෙන්නේ , ඉන් පෘට් සැලඩ් එක අහෝසි වන බව දැන දැනම  දැම්මාදෝ කියාය . අනෙක් අතට පෘට් සලාදය බාරව සිටි එවුන් , පලතුරැ කපා දමා , දැන් ඕන දෙයක් දා ගනින් යා කියා යාමද මට නොතේරේ . 

කෙසේ හෝ හොරකමක් වී ඇත . හොරු නැත . හොරෙකුගේ චායාවක් පෙනුනද , එහෙනම් තොපි කලින් කට වහන් හිටියේ ඇයි කියා අහන්නේ අපෙන්මය  


18 October 2016

දවල් තරු

එතකොට වෙලාව හරියටම හතරයි හතලිස් පහයි . ඩෙල්ෆියස් තරු පන්තියේ පස්දින්නක්  තරු දීප්තිමත්ව පායලා  . .. 

මේ දවල් ?මේ තරු ?

නිකමට වගේ කියමු යමෙක් , ඇඟිල්ලකින් , නිකමට වගේ දබරැඟිල්ල කියමු ..සරල රේඛාවක් ඇන්දොත් එහි පහලින් ඇති තරු දෙක හරහා , දෙවැනි තිතෙන් නොනැවතී දිගටම විශ්වයේ ගමන් කලොත් නිකමට වගේ , හමුවෙන්නේ ඇකියුලා නොහොත් රාජාලියා .  

යමෙක් ඒ දබරැඟිල්ලම සෙමින් ඔසවා , මේ මහා දවල් නිදි ගත්තවුන්ට දැනෙන නොදැනෙන සේ,  ඉහලින් ඇති  තරු දෙක හරහා වැටුණු සරළ  රේඛීය  මගේ දිගටම ගියොත්  හමුවන්නේ පෙගසස් . 

ඒත් ..විශ්මය දනන දේ හමුවන්නේ , කිසිවෙක්  වැඩිපුර නොයන මගක ගියවිටමයි . අතරමං වූ විටයි .

අඳුරු , නිහඬ විශ්වයේ අතරමං වූ ඉබාගාතේ යන්නෙකුට ,  කාලය ඕනෑ තරම් ... වෙන මොනවා කරන්නද ගමන් කරනවා හැරෙන්න .. 

ආ මේ මොකක්ද ?  අලුත් ඉරක් !. 
අලුත් කිව්වට , සමහර විට කල්ප ගණනකට පෙර නිවී ගිහින් ඇති .ඒත් මේ දිග හැරුණු ආලෝක මතකය , උත්තර ද්‍රෑවයට නැවුම් දීප්තියක් ව,   පෙන්වාවි මග,  තව දිගුකලක්,  වන්දනා කරුවන්ට, සංචාරකයන්ට , ඉබාගාතේ යන්නන්ට .

"මොකද කරන්නේ " ඈ ඔහු දෙසට හැරුණාය 

"මම හිතන්නේ , අලුත් උපන් ලපයක් .."

"මොකක් ?"  ඈ හිස පිටුපසට  හරවා උරහිසට උඩින් එය දැක ගන්නට තැනුවාය 

" කලබල වෙන්න එපා , ඒක  ලස්සනයි "

"කොහේද  මේ උපන් ලපය තියෙන්නේ "

"අංශක කීපයක් නැගෙනහිරින්  ඩෙල්ෆියස්ට "

"මොකක් කිව්වා ?"

"උරස් තල දෙක මැදින් , හරියටම පිට මැද  "

"මගේ පිටේ උපන් ලප කීයක් තියෙනවද ?"

"අහසේ තරු කීයක් තියෙනවද ?"


(පිටුව 199 , A Gentleman in Moscow)

පලි

සමහර පොත් කියවන්න ඕනේ හෙමින් හෙමින් . ඉවර වෙයි කියලා හිතට ලෝබයි . ඉඟුරු තේ එකක් හකුරු කෑල්ලක්  එක්ක බොනවා වගේ . මේ පොත ඒ වගේ .


සමහර දිගම දිග කතා ඇතුලේ , ඔබට කෙටි කතා හමුවෙලා තියෙනවද ? 

කතාව , රුසියාවේ විප්ලවයෙන් පස්සේ , ක්‍රෙම්ලිනයේ සුඛෝපභෝගී හෝටලයක නිවාස අඩිස්සියට පත් වෙන ප්‍රභූ වරයෙක් අවුරුදු ගානක් ( 30ක් විතර ) ගත කරන හැටි .

කියවන ගමන් මම කෙටි කතා විය හැකි යයි හිතෙන තැන්  හිතෙන් සලකුණු කර ගත්තා . හැකි විදියට මෙහි පලකරන්නයි අදහස . ඒත්  මේවා කෙටි කතා වලට වඩා මැද  කතා යයි හිතෙනවා 


පොත  කියවලා ඉවරයි , ඒත් පැත්තකින්  තියන්න හිතෙන්නේ නෑ . 

14 October 2016

ඔබද ජනාධිපති.....

...නැවතත් අපි තරඟය සමග . මෙන්න ඔබට ලැබෙන ඊළඟ ප්‍රශ්නය 

පසු ගිය දිනෙක මනඃකල්පිත රාත්‍රී සමාජ ශාලාවක ,මනඃකල්පිත පිරිසක් ,මනඃකල්පිත කලබලයක් ගැන වාර්තා වුනා  . පසුවදා , ගහපු එකෙකුත් නැති , සැක පිට අල්ලපු එකෙකුත් නැති , ගුටි කාපු එකෙකුත් නැති . මෙවැනි අවස්ථා වකට යෙදිය හැකි ගැමි පිරුල කුමක්ද 
ඒ උනුත් එකයි මුනුත් එකයි , 
බී අල වගේද ගෝවා , 
සී කිඹුලා කනවා ඉවසුවට කොහිල කටු ඇනෙනවා ඉවසන්න බෑ, 
ඩී එතකොට සියඹලා ගෙනල්ලාම නැද්ද 

මං හිතන්නේ ඩී  හිටං , සියඹලා ගෙනල්ලාම නැද්ද 

ඔව් නිවැරදි පිළිතුර ඩී .. මෙන්න ඊළඟ ප්‍රශ්නය 

ලජ්ජා නැතිකමට වඩා විශාල නැතැයි  ගැමි වහරේ කියවෙන්නේ කුමක්ද 
ඒ මහා මුදලි කම,  
බී ජනාධිපති කම  , 
සී දරු ස්නේහය , 
ඩී සමුපකාර සභාපතිකම 

හ්ම්ම් .. දරු ස්නේහයයි , සමුපකාර සභාපති කමයි හෙන ලොකුයි  නේ හිටං ...ලජ්ජා නැතිකමට වඩා  ලොකු ජනාධිපති කම වෙන්න ඇති 

ඕ ඕ ඕ  ව් ..නිවැරදි පිළිතුර බී .. ඔබ කෙමෙන් කෙමෙන් කප් එක කරා ලඟා වෙනවා .... ඊළඟ ප්‍රශ්නය ගන්නවද 

ගන්නවා හිටං 

හොඳින් සවන් දෙන්න ....පැරඩොක්සයක් වන්නේ මේ අතරින් කුමක්ද 

ඒ නීතිය සැමට සාධාරණ විය යුතුයි ඒත්  ඇතැමුන්ට එය වඩාත් සාධාරණ විය යුතුයි 
බී මමත් මේවාට  දැඩි පියවර ගන්නවා ඒ වුනාට මම කලින් කට්ටිය වගේ නීතියට අත ගහන්න යන්නේ නෑ 
සී  මම මේවා ඔක්කොම දන්නවා , ඒ වුනාට කට්ටියට යුතුකමක් තියෙනවා මාව දැනුවත් කරන්න 
ඩී මම මේ රටේ විධායක ජනාධිපති, මේ වෙන දේවල් වලට මට වග කියන්න බෑ 

අම්මට හුඩු ..මාර  ප්‍රශ්නයක් නේ ... මම ගොවි පුතෙක් හින්දද මන්දා මෙහෙම අමාරු ප්‍රශ්නම දෙන්නේ 

ඔබට ලයිෆ් ලයින් එකක් පාවිච්චි කළ  හැකි බව මම මතක් කරනවා.

එහෙනම් පත්තරෙන් විස්තරේ බලන්න ඔප්ෂන් එක පාවිච්චි කරන්නං 

එහෙම එකක් නෑ  , ඕනේ නම් ආස්ක්  අ ෆ්‍රෙන්ඩ් ඔප්ෂන් එක දෙන්නම් 

හරියන්නේ නෑ  මහත්තයෝ , එහෙම කියලා විශ්වාස කරන්න පුළුවන් එකෙක් නෑ  ...ඔන්න ඔහේ ඕන එකක් ගන්න 

පිළිතුර ලොක්  කරන්නද 

ඔක්කොම හරි වගේ හිටං 

ඔව් ඔබ නිවැරදියි . සියලුම පිළිතුරු නිවැරදියි 

හහ් හාහ් ..දැක්කද මමත් මෙහෙම හිටියට සිරා පොරක් හිටං 

මෙන්න ඊළඟ ප්‍රශ්නය , ශ්‍රී ලංකා ප්‍රජාතන්ත්‍රවාදී සමාජවාදී ජනරජයේ විධායක ජනාධිපතිට ඇති වගකීමක් වන්නේ 
ඒ රට රැකීම 
බී ගොඩ රැකීම 
සී ඇඟ බේරා ගැනීම 
ඩී   පිළිකුලෙන් හෙලා දැකීම 

අර ඔප්ෂන් එක දැන් ගන්නද 

හරි ඔබට ඒ අවස්ථාව ලබා දෙනවා 

අගමැතිතුමාට කෝල් එකක් අරන්දෙන්න හිටං . .. (කසුකුසුවක් ඇසේ ).... ඩී කියලා කියන්න කියලා එයා කියන්නේ හිටං 

ඔව් නිවැරදි පිළිතුර හැටියට බාර ගන්නවා ..මෙන්න හතරවෙනි ප්‍රශ්නය..  

ජනාධිපති විධාන නිකුත් කිරීමට උචිත සභාවාරය කුමක්ද 

ඒ පාර්ලිමේන්තු සැසි වාරය 
බී කැබිනට් මණ්ඩලය 
සී පක්ෂ රැස්වීම 
ඩී දහම් පාසල් තෑගී බෙදා දීමේ උත්සව සභාව 

පාර්ලිමේන්තුවේ , කැබිනට් එකේ කියලා වැඩක් නෑ .. පක්ෂ රැස්වීමේ කියන්න බෑ  කෑ ගහනවා ..දහම් පාසැල් ළමයි ටික නම් අහගෙන ඉඳියි . උත්තරය ඩී   


ඔව් 
ඔබ සාර්ථකව පිළිතුරු දෙනවා ....එයත් නිවැරදි පිළිතුර හැටියට බාර ගන්නවා .  මෙන්න පස්වැනි ප්‍රශ්නය 

අසරණ කම කුමක් වැනිද? 

ඒ වලිගය නැති ගොනා වැනිය 
බී ජාතික ආණ්ඩුවක විධායක ජනාධිපති වැනිය 
සී ගලේ පැහැරූ බළලා  වැනිය 
ඩී ඔප්ෂන් නැති ජනතාව වැනිය 

(දිගු සුසුමක් ) බී නේ හිටන් 

ඔබ තවම තරඟයේ රැඳී ඉන්නවා . .. අපි මදකට වෙළඳ විරාමයක් සඳහා යොමු වෙනවා ..ඒ අතරතුර චැනල් මාරු නොකර ...එට්කා  , දහම්  , නීතියේ හිල්,  බැඳුම්කර , ආණ්ඩුක්‍රම ව්‍යවස්ථා සංශෝධන , එළිපිට කෙරෙන හොරකං වැනි 
නොවැදගත් දේ ගැන ඔබේ අවධානය යොමු නොකර , අපිත් සමග දිගටම රැඳී සිටින්න .....

මේ ....ඔබද ජනාධිපති මමද ජනාධිපති 

08 October 2016

ලජ්ජා බයේ හිල් , සදාචාරයේ හිල් , නීතියේ හිල් සහ වෙනත් හිල්

ගමේ නාන ලිඳ මැදින් දෙකට බෙදා තිබුනේ ගැහැණු සහ පිරිමි අංශ දෙක මැදින් , එක්  කට්ටියක් නාන විදිය අනෙක් කට්ටියට නොපෙනෙන්න 
නාන විදිය අනෙක් අයට නොපෙන්නය .  

ගොම්මන් පැයේ , සිය ගත සළු උනා , නිදහසේ ස්නානය කළ  අය  සිටියද , හැරිසන් ගොයියා නම් නෑවේ සැමවිටම ලංකට් එක පිටින්මය . 
ඔහුගේ හේතු දැක්වීමට අනුව ඒ ඔහුගේ ලජ්ජා බය නිසාය . වතුරටම පාට වියකුණු ලංකට් රාජයාගේ පස්චාත් ප්‍රදේශයේ තිබුණු හිල මුලින් නම් ජමනාරන්  ගෙඩියක් තරම් විය. කොල්ලෝ ඊට කීවේ ලජ්ජා බයේ හිල කියලාය . මේ හිල එන්න එන්නම ලොකු වී මුළු පස්චාත් ප්‍රදේශයම නිරාවරනය කර තිබුනත් . හැරිසන්ට ගානක් නැත , ඔහු ලංකට් එක මාරු කලෙත් නැත . ඒ ගැන ඇසු  විට ඔහු කීවේ , පිටි පස්සේ තියෙන හිල  තමන්ට නොපෙනෙන නිසා ඉන් ඔහුගේ ලජ්ජා බයට හානියක් නැති බවය .

අර ගෑනු අංශය සහ පිරිමි අංශය වෙන්කරන තාප්පයේද ගෑනු පැත්තේ නාන සිරිය නැරඹීමට සාදා ගත් හිලකි .  මුලින් සතපනහක තරමවූ මීට ඇස තියා සෝ එක නැරඹුවන් අතරින් හැරිසන්ද මුල් තැනක් ගත්තේය . හැරිසන් මේ හිල හැඳුන්වූයේ  සදාචාරයේ හිල කියාය .  ගෑනු නෑවේ  පිරිමි පැත්තට පස්ස හරවා ය . ඒ ලජ්ජා බය වැඩි කමටය . ඒ නිසා  සදාචාරයේ හිලෙන් නොව , තාප්පෙන් එබී බැලුවත් ඔවුහු නොදකින්නෝය . කාලයාගේ ඇවෑමෙන් , එක එකා මේ හිල හරා විශාල කර ගත්හ . පසු කලෙක මෙය ගඩොල් බාගයක් තරම් කුහරයක් වුවත්  සදාචාරයේ තාප්පයට පස්ස හරවා ගෙන සිටිනා කල් මේ හිල  කිසිවෙකුට නොපෙනේ .

මේ ගැන මට මතක් උනේ පහුගිය දවස් වල අසන්නට ලැබුණු කතා කීපයක් නිසාය 



පේරාදෙණිය වලේ මම නාට්‍ය බලා නැත්තෙමි . එය මුලින්ම කිව යුතුය . එය මගේ බකට් ලිස්ට් එකේ තිබුනද මග හැරුණි. එහෙත් එය පන්සලක් දේවාලයක් නොවන බව දනිමි. විශ්ව විද්‍යාල යනු සමාජයක පමණක් නොව මුළු මහත් සභ්‍යත්වයකම නිම්  වළලු ඈතට තල්ලු කිරීම පටන් ගන්නා තැන්යයි සිතමි . එය ඉස්කෝලයක් නොවන්නේ එබැවිනි   . ලසියෙම් එක වේවා , අභයගිරිය වේවා එය එසේම විය . එවැනි තැනක , තමන්ගේ පරිකල්පන රාමුවට එහායින් හෝ තමන්ගේ සිත්වල මවාගෙන තියෙන සංස්කෘතික අවතාරයනට ජීරණය නොවෙන දෙයකට හු කීම, කොටින්ම ජෝක් එකකි .  මට හැරිසන්ගේ ලජ්ජා බයේ හිල සිහි විය 

මේ සතියේ තව කතාවක් පැතිරෙන්නට විය .
චුදිතයන්ට හා පැමිණිලි කරුවන්ට පමණක් නොව චුදිතයන්ගේ අඹුවන්ටද නීතිය වදාරන්නට ගිය නඩු කාරයෙක් ගැන කියන්නට ගිය කළ ,   උසාවිය නිහඬ ව නොසිට , කලාව නිහඬ කිරීමට ගත අතුරු තහනම් නියෝගයක  කතාවක් ඇසුනි .
උක්ත , සදාචාරයේ මුරකරුවන් පමණක් නොව අපි කවුරුත් හිලට පස්ස හරවාගෙන , වතුර පනිට්ටුව ඔලුවේ හලා ගන්නවාදෝයි මට සිතුනි .

නමුත් ප්‍රබන්ධයට වඩා සත්‍යය හැම විටම ගැඹුරුය . චිත්‍රපටයකට එරෙහිව අතුරු තහනම් නියෝග ගත හැකි වුවද , අසූචි  ප්‍රහාරයකට විරුද්ධව අතුරු තහනම් නියෝග බල ශුන්‍ය ය .

පලි :

මෙකී හිල් වලට අමතරව වෙනත් හිල් තිබේද ?
එසේය 
ඒ මොනවාද 

" මම ජාති වාදියෙක් නෙවේ "- මතකයේ හිල් 
""සීමා නීර්ණය ඉවරයි ඒත් පොඩි ප්‍රශ්නයක් තියෙනවා" - නීතියේ හිල් 
"වල්  අලි ඔක්කොම , හීලා කරලා බාර දෙනවා පුද්ගලික ආයතන වලට බලා ගන්න . මේක කරන්නේ අපි අලි බේරා ගන්න " - මොළේ හිල් 

02 October 2016

අහිංසකි , දුක නම්

අහිංසකී  , දුක නම් 
සුළං පොදක් සේ 
ඔහේ හමා විත් 
ඇඟේ  වැදී , වැදී 
කෙහෙරැළි  අවුළා 
ඇස් කෙවෙනි යාන්තමට 
පොඟවා 
සුසුම් මිට මොලවන් 
යන්නී 
ඔහේ 

ඒත්  
සතුට නම් , මායාකාරී 
අකල් හෙණක් සේ 
කන් අගුල් 
සියොළඟ හිරි 
වට්ටා 
උන්හිටි තැන් ද 
අමතක කරන්නී 
ඈ 

27 September 2016

සංහිඳියාව සහ තුවාල මාටියාගේ ක්‍රමය

මුල් කතාව මා මිතුරෙක් කී කතාවක් 

"මචං   ලංකාවේ සංහිඳියාවක් නෑ  කියලා මට තේරුනේ මුලින්ම කෙල්ලෙක් යාලු කරගත්ත දවසේ . මේකිගේ ජාතිය ජන්මය දන්නේ නැතිව , පෝය දවසේ පන්සලකට ගෙනියනවද , කෝවිලට ගෙනියනවද , සිකුරාදා පල්ලි ගෙනියනවද මට මාර ප්‍රශ්නයක් ආවා . මොකද අපේ හිත ඇතුලේ කොම්බුවක් වගේ දරන ගැහිලා ඉන්න ජාතිවාදියා ජාතිකත්වවාදියා ට  වෙන එකෙක් ගේ පල්ලියකට ගියාම නිකන් ඉන්න බෑනේ ...නලියනවා , සසඳන්න  ගන්නවා. 

ඊළඟට අතේ තියෙන ගාණට  සරිලන්න , කන්න කොහේ හරි ගියොත්  එතනත් ප්‍රශ්න ... ඔලුව වහ ගත්ත මුස්ලිම් කෙල්ලෙක් එක්ක සිංහල කඩේකට යන්න බෑ  , දෙමළ  කෙල්ලෙකුට සිංහල කොල්ලා එක්ක යාපනේ තොසේ කඩේකට යන්න බෑ  . 

හැබැයි එක තැනක් තියෙනවා සංහිඳියාව තියෙන .. ඔඩෙල් එක . මොකා ගියත් ප්‍රශ්නයක් නෑ . දෙයියෝ ගාව නැති සංහිඳියාව දෙයියන්ගේ මල්ලි ගාව තියෙනවා . අනාගතයේ සමාජවාදයේ පල්ලිය පන්සල ඇතිවෙනකන් , සංහිඳියාව (ගෙවලා හරි ගන්න ) තියෙන්නේ ධනවාදයේ පන්සල් වල විතරයි දැනට "
***

ඉස්සර අපේ (අර්ධ නාගරික)  ගමටම තිබ්බේ එක ඩිස්පෙන්සරියයි . දොස්තර මහත්තයා උදේ  ඉස්පිරිතාලේ වැඩ කරලා ඩිස්පෙන්සරියට ආවේ දවල් කෑමෙන් පස්සේ වගේ තමයි මට මතක. ඔහුට තිබ්බා පරණ වොක්ස්වැගන් කාර් එකක් ( කනේ මයිල් මොඩල් එකේ ) . 

දොස්තර හැරුණු කොට, මුළු ඩිස්පෙන්සරියටම හිටියේ , එක නර්ස් කෙනෙකුයි ,  තුවාල මාටිනුයි විතරයි . 

නර්ස් නෝනා කලේ උණ බලන එක   , නම ගම ලියාගන්න එක , නොම්බර කතාකරන එක , ගෑණු කෙනෙක් එක්ක දොස්තරගේ කාමරේට ගිහින් තනි රකින එක වගේ දේවල්  . ඊට අමතරව බෙහෙත් කලවම් කිරීම මෙන්ම , ඉතාමත් රුදුරු කාර්යක් වූ ඉන්ජෙක්ෂන් ගහන එකත් ඇයට පැවරුණා . 

තුවාල මාටින් තමයි ඩිස්පෙන්සරිය උදේට ඇරියේ , හවසට වැහුවේ . සුද්ද පවිත්‍ර කලේ . .. ඒ ඔක්කොටම වැඩියෙන් වැදගත් රාජකාරියක් ඔහුට පැවරී තිබුනා . ඒ තමයි තාර පාරේ , බොරළු පාරේ බෝල ගහන්න ගිහින් කකුල් ලෙලි ගහ ගන්න , ටින් කඩන්න ගිහින් වීදුරු කටු වලට යටිපතුල් කපා ගන්න, බයිසිකල් පදින්න ගිහින් චේන්  වලට කකුල් කපා ගන්න ,  යටි පතුලේ කම්බි ඇණ , ඇන ගන්න , මෙකී  නොකී විවිධ ආබාධ වලට ලක්වෙන පොඩි එවුන්ගේ තුවාල වලට ප්‍රතිකාර කිරීම . .. 

හැම තුවාලෙකටම ඔහු ළඟ තිබ්බේ එක ප්‍රතිකාර ක්‍රමයක් . හැබැයි අත්දුටුවයි ප්‍රත්‍යක්ෂයි . 
මුලින් බයෙන් බිරාන්ත වෙලා ඉන්න පොඩි එකාව  පුටුවේ හිඳුවා , "පොඩ්ඩක් වත් රිදෙන්නේ නෑ"  කියා , සැව්ලෝන් වතුරෙන්  තුවාලය සෝදන්න ගන්නේය . පරණ තුවාලයක් නම් , වටේ කුණු හම කඩා, හම තුලට කාවැදුණු වැලි කැට වීදුරු කටු තියේ නම් ඒවා පිරිසිදු කරන්නේය . මේ වෙනකොට පොඩි එකාට , මාටින් සත්ය්වාදියෙකු නොවන වග සනාථ  වී හමාරය . ඉන්පසු සිකට්‍රීන් කුඩු මදක් තුවාලය මතට ඉස , මහා ප්ලස්ටරයකින් වසන්නේ , පිටත විසබීජ වලින් මෙන්ම , ජොලියට , සොමියට සහ ආතල් එකට අනිත් එවුන්ගේ තුවාල පාරන  එවුන්ගෙන් බේරා  ගැනීමටය .

"තුවාල වලට බෙහෙත් කරන්න බෑ  .. තුවාලේ වටේට සුද්ද කරලා ,  එළියේ විසබීජ වලින් ආරක්ස්සා කරගත්තම , ඕනෑම තුවාලයක් ඉබේම හොඳ වෙනවා " ... ඒ තුවාල මාටියාගේ ක්‍රමයයි .හැම පරණ තුවාලයකටම ඔට්ටුද මන්දා ?

17 September 2016

ආදරේටනේ .......... ( නූතන ආදර කතාවක් )

බාහුව වෙළී 
බඳ  වටේ 
වකය විඳ 
නිතඹ මායිමේ 
ඇදී පහළට 
හෙමී හෙමිහිට 
කොට  සාය 
වාටියෙන් අල්ලා
මදක් ඉහළට 

ආදරේටනේ ඒ..

කූඩූ  නැතිව මොන 
ප්‍රීති වෙසක් වෙද ?

ඉහලන් 
කියුටෙක්ස් පාට නිය කුඩය 
හීන් සුසුමක උණුහුමින් මුවාවී 
රතැඟිලි සක්මනේ 
ලිනන් කමිසේ , රැහැන් හිදැසේ 
නොපැටලී  මං  මුළාවේ  

ගොරෝස් ඩෙනිම් සාක්කු වාටිය දැනෙන 
නොදැනෙන  මානේ 
පිම්බුණු සම් පසුම්බිය 
හීතල 
කොණින් අල්ලා 
හෙමින් එළියට 
අදිද්දී දැනේ 
බර 
මොණරුන්ගේ 

ආදරේටනේ .... ඒත් .

දන්සැලක් හෙම නැතිව 
කොහේ වෙසඟේ අසිරිය ?

පලි :


මේ කවට  නිමිත්තක් තියෙනවා . එය මම දැක්ක කාටුන් චිත්‍රයක් . උයනක බංකුවක  ඉඳන් ඉන්න යුවලක් . කොල්ලා කෙල්ලගේ රෙද්ද පොඩ්ඩක් උස්සනවා . කෙල්ල කොල්ලාගේ පර්ස් එක සාක්කුවෙන් පික් පොකට් ගහනවා . ගිය සතියේ මතක පද අහද්දී බිමල් රත්නායක මේක මතක් කළායින්  ආයෙත් මතක් උනා .

11 September 2016

නිව් සුමනදිසි හෝටලය සහ අලුත් පාර්ලිමේන්තුව

සුමනදිසි  හෝටලය අනාදිමත් කාලයක සිට  එලෙසම පැවතුනි . කැෂියර් කූඩුව ඉස්සරහ දුවිලි වැකුණු සෝ කේස් එක මෙන්ම,  පුටු , කෑම  වට්ටෝරුව , රස , ගඳ , වේටර්වරු පමණක් නොව කුණු වැකුණු බෝඩ් ලෑල්ල ද කාලාන්තරයක් නොවෙනස් ය . නමුත් , දිනය හරියටම නිච්චියක් නැති එක්  දිනක ඒ බෝඩ් ලෑල්ල ගැලවී අලුත් ඊස්ට්මන් වර්ණ බෝඩ් ලෑල්ලක්  වෙනුවට අර පරණ යකඩ රාමුවේම සවි විය . "නිව් සුමනදිසි හෝටලය හා බේකරිය " බෝල අකුරෙන් ලියා තිබුණි . නමුත් හෝටලය ඇතුලේ පරණ පුරුදු ලෙසම පුටු , කෑම  වට්ටෝරුව , රස , ගඳ , සහ වේටර්වරු එලෙසම විය . 

මෙය එක්තරා ට්‍රෙන්ඩ් එකක් ය . සුමනදිසි හෝටලය පමණක් නොව . එන්රිච් , නිව් එන්රිච් වීම , රාහුමනියා නිව් රාහුමනියා වීම , පිලාවූස් , නිව් පිළාවූස් වීමද මෙසේම සිදුවිය.



***

"යක්කු බය කරන්න සොහොනක් ගාවින් යනකොට ,  තනි අලියා මගදී මුණ ගැහුනොත් , අපේ  මුතුන් මිත්තෝ කලේ තිත්ත කුණුහරුපයක් දෙකක් කීමයි  ... ඉතින් කුණුහරුප කියන්නේ අපේ සභ්‍යත්වයේම සංස්කෘතියේම අංගයක් .. නමුත් නොබෝ දිනෙක කුණුහරුප කියුවා කියා තරුණයෙක් පොලීසිය  විසින් අත්අඩංගුවට ගැනුනා ..

මම අංක සමරජිත් ...මේ අලුත් වගේ පාර්ලිමේන්තුව ... අද අපි කතාකරන්නේ කුණුහරුප ගැන ..."

ඩිංගි ඩිගා ..ඩිංගි ඩිගා ..ඩිංගි ඩිගා ..ඩිංගි ඩිගා ...ඩිෂ් 

"හඳුනා ගනිමු අපේ විසේසඥ මඩුල්ල , මුලින්ම කැලණිය විස්ස විද්‍යාලයේ කුණුහරුප හා දේශීය  සභ්‍යත්වය පිලිබඳ මහාචාර්‍ය  අ මා ට හු පියසේන  මහතා . ඉන්පසු මේ දවස්වල ඉතා ප්‍රසිද්ධ සමාජ විශ්ලේෂකයෙක් හීන් බබා සීයා . අපේ වැඩසටහනේ නිත්‍ය සාමාජිකයෙක්  , හැමදේටම විරුද්ධ , කුමාර එපා බණ්ඩාර  මහතා . රැප් චක්‍රවර්ති ජරාස් . අවසාන වශයෙන් අපේ දේශීය සංස්කෘතියේ සිංහල කමේ ප්‍රතිමුර්තිය, නදුන් ගමුවේ හස්ති රාජයා ."

අපි මුලින්ම මහාචාර්ය තුමන්ට යොමු වෙමු 

කු . එ  බ : " එපා , එහෙම කරන්න එපා "

අ .ස : නෑ  නෑ  ලොක්කා දැන්ම විරුද්ධ වෙන්න එපා . තාම පටන් ගත්තෙත් නෑ නේ 

කු . එ .බ ; ආ එහෙමද , එහෙනම් ඇහැක් ගහන්න  විරුද්ධ වෙන්න ඕනේ වුනාම ... හැබැයි මගේ වෙලාව මට දෙන්න 

අ.ස : හරි , මුලින්ම අපි මහාචාර්ය තුමාට යොමු වෙමු . මොනවද මේ කුණුහරුප කියන්නේ ?

මා ආ මා ට හු පි :  
කුණුහරුප කියන්නේ ඉස්සර මිනිහෙකුට කිව්වහම ලජ්ජා හිතෙන , සමාජ අසම්මතයයි හැඟෙන දෙයක් නේ . බොහෝ කුණු හරුප ලිංගික අවයව හා සම්බන්ධයි නේ . ඒ අපි විලිවහගෙන ඉන්න නිසා . එහෙම නැත්නම් විෂම ලිංගික ක්‍රියා නේ .  මේ වික්ටෝරියානු සංස්කෘතිය අපි වැළඳ ගන්න කලින් , ලිංගික නිදහස ,  නිරුවත අපට ප්‍රශ්නයක් නෙමෙයි . ඉතින් ඒ කාලේ කුණුහරුප වෙන්න ඇත්තේ ...ගෙරිමස් කෑම  , බේබදු කම, හොර කම වගේ දේවල් . 

අ.ස : ඉතින්  මේ කුණුහරුප අපි කාලයානුරූපිව විකාශනය කර ගත යුතුද , එසේ කර ගන්නේ කෙසේද 

කු .එ . බ ;  දැන් මේ කුණුහරුප කියන්නෙම ප්‍රොජෙක්ට් එකක් නේ .. මේ අවස්ථාවේ ගෝලීය කුණුහරුප කුමන්ත්‍රණයක් ක්‍රියාත්මකයි 

අ.ස . මේ ඕයි පොඩ්ඩක් පනින්නේ නැතිව ඉන්නවද ? ආයේ ගෙන්න ගන්නේ නෑ  

කු .ඒ . බ :  හරි හරි ශේප් , හැබැයි මගේ වෙලාව දෙන්න 

අ.ස ; හීන් බබා සීයා මහතා . ඔබේ විශ්ලේෂණය කුමක්ද කුණුහරුප වල විකාශනය ගැන 

හී .බ .සී :  අපේ අපුච්චා ඉන්න කාලේ අම්මේ... , අලුත් කුණුහරුප කොච්චරනම් හැදුවද ... ඒවා මේ රෙදි වලින් වහලා තියෙන දේ , කළුවරේ කරන දේ ගැන නෙමෙයි ඕං හුමුක්  .. මේ එලිපිට වෙන දේ ගැන නේ .. අයිස්චර්ය කියයි ,  විදේසිය  කුමන්ත්‍රණ කියයි ...කොටින්ම අපේ අපුච්චා පුරුදු කරලා අපේ ගමේ ඒ දවස්වල මිනිස්සු හවසට පොඩ්ඩක් කටේ ගා ගත්තම බැන  ගත්තෙත් "අපේ හාන්දුරුවනේ .." කියාගෙන නොවැ ඕං ... හුමුක් 

එපා බණ්ඩාර මහතා , ඔබට යම් අදහසක් කියන්න තියෙනවද 

එපා .. නෑ  මම කියන්නේ ඔව් තියනවා 

හරි පොඩ්ඩක් තියාගන්න ..අපි වෙලාව බලලා එන්නම් 

නැවතත් අපි ඔබත් සමග , ඔව් කුමා මහතා කියන්න 

මම නම් කියන්නේ මේක ලොකු ප්‍රොජෙක්ට් එකක් .. ඒ කියන්නේ  මේ අවස්ථාවේදී ගෝලීය කුමන්ත්‍රයක්  දියත් වෙනවා ..සිංහල ජාතියට එරෙහිව .. එකේ ප්‍රතිපලයක් හැටියට තමයි අපේ මේ කයිසර් කියන අමු සිංහල සහෝදරයාව අත්අඩංගුවට ගන්නේ 

කයිසර් කියන්නේ මුස්ලිම් කොල්ලෙක් නේද 

ආ එහෙමද ... 

දැන් අපි යොමු වෙමු ජරාස් ට . ජරාස් ඔබ ගායකයෙක් 

නෑ  මම සින්දු කියන්නේ නෑ නේ 

ඔබ සංගීතඥයෙක්  ?

නෑ  මම මියුසික් හදන්නෙත් නෑ  

එහෙනම් ?

මම අර මියුසික්  වීඩියෝ වල පෙනී ඉන්නවා විතරයි .

හරි.  ඔබට මොකක්ද තියෙන අදහස මේ ගැන 

මේ මයි , මේ කුණුහරුප කීන ඒවා මෙයා , සිංහලීස් වලින් කිව්වම පොඩ්ඩක් දිරවන්න අමාරුයි .. ඕක ඉන්ලිෂ් වලින් මදර් ෆ් ..

මේක පොඩි ළමයිනුත් බලනවා ඒ නිසා එවැනි වචන කියන්න එපා 

හැ .. මේවා පොඩි ලමයිනුත් බලනවා ?

ඔව් ඔව් වැඩිපුරම පොඩි ළමයි තමා බලන්නේ 

හරි එහෙනම් මම ඒක  කිව්වා කියලා හිතා ගන්න කෝ ... ඔය ඉංග්‍රීසි කුණුහරුප , කට්ටියට හරියට තේරෙන්නේ නැති උනාට දිරවනවා .. කිසිම අජීර්ණයක් නෑ  ..හැබැයි දැන් ඕක ඊළඟ ලෙවල් එකට යද්දී දේශීයකරනය වෙද්දී , සිංහල රැපර්ස්ලා  බිහිවෙනවා නේ .. ඉතින් එතකොට ඔය ඉංග්‍රීසි කුණුහරුප නිකන්ම ට්‍රාන්ස්ලේට් වෙනවා ..එතකොට ඒවා දිරවන්නේ නෑ අමු තිත්ත කුණුහරුප වෙනවා . 

මා ආ මා ට හු පි :  දැන් එක්දාස් නවසිය හතලිස් ගණන් වල උනෙත් ඔය වගේ දෙයක් නේ . ලෝකයේ ඇතිවුන සමාජවාදී රැල්ල , ඉන්දියාවේ නිදහස් සටන අපි දේශීයකරණය කළා . ඒවා අපේ රටේ කුණුහරුප උනා .
කලම්බු ඇකඩමිය ට, පල්ලියේ ඉස්කෝල වලට චැලේන්ජ් කරන්න දේශීය  ඉස්කෝල හැදුවා . ඒවායින් බිහිවුනේ ඇතුල සුදු කට්ට කළු මිනිස්සු . ඒවායින් පල්ලියේ ඉස්කෝල වලට කිසිම දෙයක් උනේ නෑ  , තිබ්බ පිරිවෙන් ටිකට කෙළ  වුනා 

ඒක  දිරවන්න නම් , සම්භාව්‍ය ස්පයිසස් දානං ඕනේ .. ඒකනේ  , යට ලීයෙන්  නාරි ලතා මල් පුදීන  එක , උකුල ලැම හැස මලාවි කරලිය මුවා කළ  දුහුල් සළු තෙර විවර කරන එක විතරක් නෙමෙයි මගේ පුංචි රෝස මලේ කියන එකවත් වල් නොවෙන්නේ 

අපි ඒ ගැන කතා කරමු , පොඩ්ඩක්  චූ  කරලා .. සොරි සොරි වෙලාව බලලා ඇවිත් 

නැවතත් අපි ඔබ සමග 

හී බ සී : අපේ අපුච්චා ඕල්කට් තුමාටත් කුණුහරුප ඉගැන්නුවා නොවැ   .. කොටින්ම ඕල්කට් රැවුල වැවුවෙත් අපේ අපුච්චාගේ රැවුල දැකලා ..ඕං හුමුක්

මා ආ මා ට හු පි : මම නම් යෝජනා කරන්නේ .. අපි මේක යා පාලනයක් ඉස්තාවර රටක් ප්‍රතිපත්ති  ප්‍රකාශනයේත් ඇතුල් කලා .. කාලයට ගැලපෙන කුණුහරුප දේශීයවම නිෂ්පාදනය විය යුතුයි කියලා ... ඒක  අපේ ජනාධිපති තුමයි අගමැති තුමයි මුලිකත්වය අරන් දැනටම පටන් අරන් තියෙන්නේ 

ඇත්තද ?

මා ආ මා ට හු පි :  දැන් බලන්න යහ පාලනය කියන වචනයම බාගේට  කුණුහරුප වෙලා නේ තියෙන්නේ . ඊට අමතරව ,  ස්වාධීන කොමිසම් සභා කියන එක , රිමාන්ඩ් බන්ධනාගාරගත කිරීම, දඬුවම් කිරීම , වංචා දූසන කියන එක,  පත්තරෙන් දැක්කා කියන එක , එතකොට පෝට්  සිටි කියන එක දැනටම කුණුහරුප වෙලා . අනාගතයේදී ... නුදුරු අනාගතයේදීම .... හම්බන්තොට වරාය කියන එකත් , සහජීවනය කියන එකත් පුර්ණ කුණුහරුප බවට පත්වෙනවා ..එතකොට ජනතාවට  දෙකක් දා ගෙන රෙද්ද උස්ස ගත්තාම , පරණ විදියට "උඹ ලෑ අම්මට " කියන්නේ නැතිව ... සිංහල බෞද්ධ  සංස්කෘතියට අනුකූලව , කට ඇරලා  "උඹ ළෑ යහ පාලනේ " කියන්න පුළුවන් 

අපේ නදුන් ගමුවේ හස්ති  රාජයා මෙතෙක් වෙලා නිශ්ශබ්දයි ..ඔබට මුකුත් කියන්න තියෙනවද 

(කුන්ච නාදයක් නැගේ )..මට නම් හිතෙන විදියට මේ රටේ තියෙන විදියට  මේ රටේ තියෙන ලොකුම කුනුහරුපේ තමයි ' ඔය කිව්ව සිංහල බෞද්ධ සංස්කෘතිය 

කු එ බ :  මේක තනිකරම ප්‍රොජෙක්ට් එකක් ...ඔබ එහෙම කියන්නේ කොහොමද? සාධක තියෙනවද 

ම. අ. ම .ට . හු .පි : ඔව් හෙම කියන්න ඔබට සාධක තියෙනවද 

හී බ සී : අපේ අපුච්චාත් කිව්වේ මොනවා හරි කිවුවොත් කියන්න ඕනේ  සාධක ඇතිවම තමා කියලයි ඕං හුමුක්

න හ රා :  අංක මහත්තයෝ , කකුල පොඩ්ඩක් ඈත් කරලා පෙන්නන්ද මේ කට්ටියට 

අ.ස : නෑ  නෑ  ..දැන් අපිට ලැබී ඇති කාලය අවසන් ඒ නිසා , ඒවා මේවා පෙන්නන්න වෙලාවක් නෑ  .... මගේ කතාව අවසානයි ..සොරි.. අපේ වැඩසටහන අවසානයි ..නිදා ගන්නට පෙර සුළු දිය පහ කරන්නට අමතක නොකරන්න  . ඔබට සුව දායක සතියක් 

09 September 2016

පාට හොරු



කොහොමද පින්තුරේ

හොඳයි ..ඒත්

ඇයි , ඒත් කිව්වේ

මට මතකයි ඒ දවස .. ඒ විල කොච්චර නිල් පාටද ... මම ජීවිතේට දැකලා නෑ  එහෙම නිලක් ...ඈත කන්දක උඩ  හිම තොප්පියක් .. මට හීතල දැනුනා .

ඉතින්

මේ පින්තුරේ ඔක්කොම පාට හොරු අරන් වගේ ... කෝ ඒ නිල

මතකද ඒ හීතල .. අර විලේ එක කොනක ඉඳන් අනෙක් ඉවුරට විසිරුණු දිය රැල්ල ...එක පාරටම දැනුනු පාළුව ..

ඔව්

නිල අයින් කරපුවහම තමා ඒවා මතු වෙන්නේ

04 September 2016

සිරිලංකා පාටිය , සිරි ලංකා පාටියේ පාටි (සහ ඒ ඔස්සේ මතුවූ අනෙක් වැඩකට නැති සිතුවිලි )


සිරි ලංකා පාටිය බිහිවීම  සිදුවෙන කාලයේ  මා ඉපදී  සිටියේ නැත . ඒ නිසා ඒ වටා වූ භුමියේ සත්‍ය මම නොදනිමි . ඒ ගැන නොදැන සම්පුර්ණ චිත්‍රයක් කිසි ලෙසකවත් ඇඳිය නොහැක . නමුත් අසා කියවා ඇති පරිද්දෙන් නම් එය , එක්කෝ සොලොමන් වෙස්ටලී රිජ්වේ ඩයස්  මහත්තයා පොඩ්ඩක් කලබල වෙලා  එහෙමත් නැතිනම් කල්යල් බලා, සිංහල මහා සභාව කාලේ ඇඳි  ජාතික බැනියම , රෙද්ද ආයෙත් ඇඳ  ගෙන ඩඩ්ලි ගේ ආතල් එක කැඩීමේ ප්‍රයත්නයයි . යමක් කියවා තීරණය කිරීමට යාමේදී , අපේ ද්වීමාන චින්තනය තුළ  සුදු සහ කළු දෙගොඩ නිර්මාණය වී , කතාවේ චරිත ඒ කුලක රවුම් තුලට තල්ලු වීම නොවැලක්විය හැකියි . ඉතින් මේ රාමුවේ සොලොමන් වෙස්ට්ලි  රිජ්වේ ඩයස් කතාවේ වීරයා වේ . කාලයාගේ ඇවෑමෙන් ඔහු සතුරන් පවා පිළිගන්නා වීරයෙක් වේ . ඒ ගස උසටම වැඩෙද්දී  ඒ යටින් තිබු තුත්තිරි ගස්ද සරුවට වැඩේ . පාර්ලිමේන්තු ලොබිය හරහා අනෙක් පැත්තට ගිය ඇතැම් අය  මහා පුරුසයන් වුයේ ඒ ඉඩකඩ තුළ  දෝයි   විටෙක සිතේ . (කුමන සාධක ඔස්සේ වුව  ) ඔක්ස්ෆර්ඩ් හී අධ්‍යාපනය ලැබූ ඔහු ගේ අකල් වියෝවෙන් පසු , සාමන්‍ය පෙළවත් නොසමත් ඔහුගේ බිරිඳ වීරවරියක් ලෙස කරලියට එන්නේද  මේ වපරසිය තුලමය . රට බාර ගන්නට සුදුස්සියක් වන්නේ බණ්ඩාරනායක මහත්තයා එක්ක  අහවල්  එක කරලා දැයි මම නොඅසමි  . ඒ ද අර ද්විමාන තර්කයේ සුදු පැත්තේ අඩුවක් ඇතිවූ බැවිනි .

කවුරු කොහොම කිව්වත් , දේශපාලනය යනු ඔය කියන ප්‍රතිපත්ති පිලිබඳ , සමාජ සාධාරණත්වය පිලිබඳ කටයුත්තක් නොවේය . දේශපාලනය කියන්නෙම ආතල් දීම සහ ආතල් කැඩීම පිලිබඳ කටයුත්තකි . එහි තුල ඇත්තේ එය පමණි . මේ සංසිද්ධි දෙක තුලින් , බලයේ රැහැන්  අතට ගත හැකි බව රෝම ග්‍රීක කාලයේ ප්‍රජාතන්ත්‍රවාදයෙන් පමණක් නොව , ධර්මාශෝකගේ ධර්මවිජය පිළිවෙත තුලද    ,  ලෙනින් , කස්ත්‍රෝ  මාඕ ගේ විප්ලව තුලද අපට හමුවේ . එක අතකට මුළු ජීවිතය පුරාම ඇත්තේ ආතල් දීම හා ආතල් කැඩීමේ නොනැවතින චක්‍රයයි . (මෙය සංකීර්ණ වී , විටෙක තමන්ගේම ආතල් එක කැඩීම  තුලින්ම තමන්ට ආතල් එකක් ලැබීමේ තැනට අයෙක් පත්වේ  .මෙය ප්‍රකෘති තත්වයක්ද විකෘති තත්වයක්ද යන්න ගැන තීරණය තම තම ගුණ නැණ  පමණින්මය .)

කෙසේ හෝ ධනවාදය තුල,  සිස්ටම් එක දිගට පැවතීමට කට්ටියක් බැට් කරන විට බෝල දාන්න මෙන්ම බෝල අහුලන්නත් කට්ටිය පිටියේ සිටිය යුතුය . සිරි ලංකා පාටිය මේ භූමිකාවට අත්‍යාවශ්‍ය විය. කොටින්ම අංකල් නෙවිව් පාටියේ පොෂ් ආතල් දිරවන්නේ නැති එවුන්ට , ගොඩේ ආතල් දීමේ ක්‍රමයක් අවැසි විය  . ජේවීපිය දෙවරක් ශොක් තෙරපියක් හරහා  සංවේදනාව වැඩි නිසා ඇඟ  හිටි වැටෙන තැනටම ඒ  ආතල් එකක්  දුන්හ එය අසාර්ථක විය . (එය ආතල් කැඩීමකින් කෙලවර වෙන බව එක සම්භාවිතාවක් බව ඔවුහුද දැන  සිටියෝයයි  මම සිතමි .   මා මිතුරෙක් දිනක් පැවසුවේ , 1977 ජේ ආර් දිනලා පහුවෙනිදා කවුරු හරි ඉඳ ගෙන අනාගතයේ වෙන්න පුළුවන් අවස්ථා පිලිබඳ සම්භාවිතා රුප සටහන්  අඳින්න ගත්තා නම් , ඉන් එක් අත්තක් නිතැතින්ම අද දක්වා සිදුවූ  සිද්ධි සියල්ල ඇමුනුන එකක් වන බවය . ඒ කියන්නේ අපේ රටේ දේශපාලන සිදුවීම් අතිශ්‍ය  ප්‍රෙඩික්ටබල් බවය . එය හුදෙක් තර්කනය පිලිබඳ ප්‍රකාශයක් නොවේය . ඇත්තටම මේ සිදුවූ කිසිම දෙයක් තුළ  කලු හංස, ඉතාම අහඹු  සිදුවීමක්,  නැත්තටම නැතිවා ය .  ඇත්තේ එකම එකකි ඒ සුනාමියයි .. නමුත් ඉන් දේශපාලනයේ කිසිම වෙනසක් නොවුනි )

ආතල් එහෙම බැරිය , නියමිත මාත්රාවටම විය යුතුය .  

අවුරුදු හැට පහක් පිරෙන සිරි ලංකා පාටියේ උපන්දින පාටි දෙකකි . එකක් නිල එකය , අනිත් එක ඒකාබද්ද එකය . මෙතැන් ඇත්තේද ආතල් දීම් හා කැඩීම් මය . ඒකාබද්ධ විපක්ෂයේ කට්ටිය හදන්නේ මේ සහයෝගිතා ආතල් එක බිඳ , නැවත ජාතිවාදී ආතල් එකක් දෙන්නය . ඔවුන්ට රෙඩි  මේඩ්,  ට්‍රයිඩ් ඇන්ඩ්  ටෙස්ටඩ් වීරයෙක් ඇත . ඔහුව මාකට් කිරීමට අවදානම් පරිසරයක් තිබිය යුතුය  . 
එක අතකින් බැලුවොත්, අපි කැමති වුවත් නැතුවත් , ආණ්ඩු විරෝධී මතයට දේශපාලන වශයෙන්  රොක් වෙන්නට ඇත්තේ  මේ මළ බද්ධයම පමණි . නමුත් ඔවුන් කරන්නේ ඒ මතය අවුස්සා , ප්‍රතිචාර පටිගත කර ගෙන , ගොන් ජෝක් දමා ඊට පසුව (canned laughter වගේ ) අර ප්‍රතිචාර නැවත ප්ලේ කිරීමය . 

මීට ආසන්නම උදාහරණය සිරිලංකා පාටියේ පාටියයි . මුලින්ම ඔවුහු අත්  උස්සා මහා පාටියේ මහා පාටියට නොයාමට ජනමතයක් ගත්හ .ඉන්පසු ඒ විරෝධත්වයට හිස නමා , වෙනම කේක්  එකක් ලෑස්ති කර  අත්පුඩි ගසා එය කැපුහ  (එහි මහින්ද රාජපක්ෂ හා දරු කැල යයි ලියා . ..අම්මපා "දරුකැල" අස්සේ අර බන්දුලයත් හිටියා .. මොනවා උනත් හිටපු ජනාධිපති කෙනෙක් නේ ..මේ අපහාස කරන එකේ සීමාවක් තියෙන්න ඕනෑ )


මට ඇති පැනය ඩලස් පවිත්‍රා ට කේක්  කැව්වා ම , සිරි ලංකා පාටි ජනතාවගේ පපු අස්සේ තියෙන විරෝධාකල්ප මතුවෙන්නේ කොහොමද කියන එකය . (චන්ඩි නම් කුරුණෑගල ගිහින් විරෝධය පාන්න තිබුණාය . මලයාසියාවට පැනලා යන්නේ නැතිව අර වේදිකාවටම නැගලා කන් වල ඇඟිලි ගහ ගන්න කතාවක් කරන්න තිබ්බාය . ආතල් කඩනවා නම් , අන්න එහෙමය )

ආණ්ඩුව හදන්නේ "ඔහොම යං " කියා , ඉඳ හිට වොයිස් කට්  , රිමාන්ඩ් කිරීම් හරහා ලාවට ආතල් දෙන්නය .  අනෙක් උන් ගේ ආතල් ලාවට කඩන්නය . අනෙක් උන්  හදන්නේ මෙවැනි සිඟිති ආතල් දෙන්නය .  පෙර කළා  මෙන් විරෝධාකල්ප වල සිනක්කර අයිතිය,   දේශපාලන පක්ෂයකට  බාර දී සිටියොත් ,  මිනිසුන්ට මේ ආතල්  මදිවෙනු ඇත. අපේ රටේ ආතල් දීමට වෙනත් ක්‍රම නැත , සංස්කෘතික ආතල් ඇත්තෙම නැතිය (ඉඳ හිට නිර්මාණ ඇති වුනත් බොහෝ දෙනාට එවන් ආතල් ගන්නට නොතේරේ).  ක්‍රීඩාව අතින් ද එහෙම කියා ජයග්‍රහණ නැත , ඇත්තේ ක්‍රිකට් පමණි . මිනිස්සු ආතල් ගන්නෙම දේශපාලනයෙන්මය. (ක්‍රිකට් අස්සේද  දේශපාලනයමය) . 

මට බය මෙහෙම ගොස්  මිනිසුන්ගේ බුද්ධියට නිගා කිරීම තවත් ඉවසා නොහි , ආතල් ඇරියස් කවර්  කර ගන්නත් එක්ක ශොක්  තෙරපියකට නැවතත් තල්ලු වේ දෝයි  කියාය.

03 September 2016

හැකර්ලා

අංකල් ,  මේ අල හැකර්ට  මොනවා වෙයිද 

දරුවා කරලා තියෙන්නේ අපරාධයක් නේ ඉතින් දඬුවම් අනිවාර්යයි 

ඒ වුනාට අංකල්  මේ යා පාලනේනේ ...අනික ඌ  වෙබ් සයිට් එකට ගිහින් තියෙන්නේ තමන්ගේ ප්‍රශ්න කියන්නලු නේ 


එහෙම කියලා බෑ  පුතා , එහෙම රාජ්‍ය වෙබ් සයිට් වලට එහෙම බලෙන් යන්න බෑ  ප්‍රශ්න කියන්න උනත් ... 

ඒ කිව්වේ අංකල් ..

මෙහෙමයි පුතා දැන් ඔය ගොල්ලන්ගේ ගෙදරට ප්‍රශ්නයක් කියන්න ගේට්ටුවෙන් කවුරු හරි ආවොත් එන්න පුළුවන් , තාප්පෙන් පැනලා ආවොත් හොරෙක් හැටියට නේ සලකන්නේ 

ඒ වුනාට අංකල්  අර කැටපත් පවුරේ නම ලියපු අක්කාව අවවාද කරලා නිදහස් කලේ ..

 ලංකාවේ කොපිරයිට් ලෝ එක එච්චර දියුණු නෑ  නේ ..පුතත් නිකං  මොන්ටිසෝරි තර්ක නේ දාන්නේ 

ඉතින් මං මොන්ටිසොරිනේ ...ඒ කියන්නේ කැටපත් පවුරේ වගේ බෑ  වෙබ් පේජ් වල ?

බෑ 

අංකල්  අර නිවුස් වලට පෙන්නපු,  එයාගේ ප්‍රශ්නේ කියන්න ජනාධිපති ගේ ඔපිස් එක ඉස්සරහ තාප්පේ ළඟ ඉන්න ඇන්ටිවත්  හිරේ දායි ද , යා පාලනේ ?

නෑ  නෑ  යහපාලනේ එහෙම වෙන්නේ නෑ  ,  තාප්පෙන් එළියේ ප්‍රජාතන්ත්‍ර වාදයට ඕනෑ තරම් ඉඩ තියෙනවා 

හ්ම්ම් ... මේ අංකල් මේ අපේ වත්තෙත් ඕකෙක්  හැංගිලා ඉඳලා මම අල්ල ගත්තා 

මොකෙක් ?

හැකර්ලා , ඌ මම එනකොටම රෝල් වෙලා මාරු වෙන්න හැදුවා . ඒවා කොහේද  ... කෙලින්ම අත්  අඩංගුවට ගත්තා ...නඩු අහනකන් දැම්මා ජෑම් බෝතලේක .... මේ 



30 August 2016

Mrs Shodienger and her cat // ශොඩින්ගර් මහත්මිය සහ ඇගේ බැළලිය

Mrs Shodinger 
sat 
with her cat 
on her lap 
purring 
sleeping 
pretending

watching a man 
watching a box 

He is
listening through the edges 
of right angles 
coming up with
quontam explainaitions
to dimensional problems 

Dinner's getting cold
She's getting too
old 
for this 

And then the cat
had to 

meow


***

ශොඩින්ගර් මහත්මිය 
සිටියාය හිඳ 
ඈ උකුලේ 
බැළලිය 
පුරු පුරු ගාමින් 
නිදි 
හොරට 

ඔහු 
සොයයි 
ක්වන්ටම් හේතුවක් 
ත්‍රිමාණ ප්‍රශ්නයකට 
සෘජු කෝණි 
බිත්ති වලට 
කණ තියා 

රෑ කෑම 
හීතල වේය

ඈ තාම 
ලත වේය 

ඔහු 
වෙනදා වාගේම 

එතැන 


බැළලිය 
ඥාව් ගෑවාය 

28 August 2016

සරන් බරන් සිට සටන් පටන් දක්වා (ගීත විචාරයක් )




මහා පෙරහැර ගොස් අවසන්ය . කොටින්ම දිය කැපීමේ පෙරහැරත්  නිමාවෙලාය .  මේ කීවේ  නුවර පෙරහැර නොව , නෙලුම් යාය  පුරා ගිය සින්දු පෙරහැර ගැනය .
ප්‍රබුද්ධ ගී විචාර ලියන උන්නැහේ මේ දවස් වල නිවාඩු ගිහින් නිසාවෙන් , ඒ අන්තරයේ , ලූලා නැති වලට කනයා කියා පහුවෙලා වුනත්  සිත් ගත් ගීතයක විචාරයක් ලිවීමට මට සිතක් පහළ  විය .

මුලින්ම ගීය අසන්න / බලන්න

මේ ගීය මා ඇස ගැටුනේ මාරම මාර යාං ලියන ශ්රංග ගේ මුහුණු පොතේ ය .

මේ ගීතය ගැනට වඩා  මේ වර්ෂන් එක ගැන මෙන්ම , මියුසික් වීඩියෝ එක ගැනම ද විචාරයකි .

මෙහි මුල් ගීතය , ගැයූ ගායකයාට වඩා , මේ ගායකයාගේ වර්ෂන් එක , මෙන්ම මේ රූප රචනයම සමකාලීන  සමාජ යථාර්තය මනාව පිළිබිඹු කරන්නේය . ඔහු ගීය පටන්ගන්නේ මිදුල ඇමදීමෙනි ,නමුත් වැඩේ මගදී ඔහු නවතා දමයි . මෙමගින් ලාංකීක ජන සමාජ හැසිරීම මනාව  පිළිබිඹු වේ. මුළු ගීය පුරාම කියවෙන්නේ නන්තාරේ ගිය , නැහැදිච්චි පැටව්  නිසා පස්චාත් තාපයට පත් වෙන පියෙකුගේ අදෝනාවකි . " නැහැච්චි  එවුන් නිසා දරුවෝ  මරන්නද ? " කියා ඔහු අසන්නේය .. අපි කොහොමෙයි තනියම නිවන් දකින්නේ කියා අසන්නේ , තවමත් මේ සංසාරේ වටේ කැරකෙන හේතුව කියා පාමිනි . රජෙක් වුවත් මෙවැනි දුකක් සිතට මහා වදයක් බවනම් කිව යුතුය . ඒ ගැන උදාහරණ මෑත අතීතයේ රාජාවලියේද  අපට හමුවේ .

මේ නළුවා / ගායකයා ඉතාම තාත්වික අයුරින් එය ඉදිරිපත් කරන්නේය . ඔහුගේ අසරණ බව , "මොනවා කරන්නද ? " කියා විනාඩි 1.09 හිදී අසන අයුර ඕනෑම කෙනෙකු හද කම්පා කරවන්නේය . මුවින්  නොකී කතා , හස්ත මුද්‍රාවෙන් කියන්නේය .

මුලදී ඉතා සංවරව සුදු සරමක් හැඳ , කමිසයක් හැඳ ගීය ආරම්භ කරනා ගායකයා . මගදී කමිසය ගලවා මොටෝ සයිකලයක් උඩට විසි කරන්නේය . මෙහිදී මොටෝ සයිකලය තාරුණ්‍යයේ බලාපොරොත්තු සහ භංග වූ දේශපාලන පොරොන්දු සංකේතාත්මකව නිරුපනය කරනවා දෝයි  සිතේ .

ගීය මගදී , සුදු සරම කැහ පට ගැසේ , සංයමය ආවේගයකට හැරේ ."සරන් බරන් " ඉබේම "සටන් පටන් " බවට හැරේ  .
ලාංකීක දේශපාලන යථාර්තයක් පොල්ලෙන් ගහනවා සේ පැහැදිලිවේ .

23 August 2016

අතුරුදහන් වූ වන් සෙවීමේ කොමිටල්

මෙන්න බොලේ උදේ පාන්දරම , කේතුමතියේ  එක්තරා ගොඩනැගිල්ලක් ඉදිරිපිට දිගට දිග ඇරුනු  පෝලිමකි . . .. මොකක් උනත් පෝලිමක් නම් නිව්ස් එකක් බව රූපවාහිනී  ප්‍රවෘත්ති බලාම උගැන ඇති බැවින්   මම ඒ දෙසට ගියෙමි.

 මේ පෝලිම මොකක්ද කියා නිරවුල් කර ගැනීමට සිතා මම පෝලිමේ මුලින් ඉන්න අයෙක් දෙසට ලං වුනෙමි .  පෝලිමේ පිටිපසින් බර බාරයක් නැගෙන්නට විය  "ආණ්ඩුවට එකතු වෙනවා වගේ බෑ   . එකතු වෙනවානම් පස්සෙන්" කියා කට්ටිය කීවත්,  එකතු වෙන්නට නොව කරුණු දැන ගැනීමට පමණක් තතනන බව ඔවුන්ට කියූ පසු ඔවුන්ගේ බර බරය  නැති විය. නමුත් " පත්තරෙන් වෙන්න ඇති ... ටීවී එකෙන් ....සංජන් මහත්තයාගේ තොත්තු සේවෙන් ..." වැනි මිමිනීම් නම් ඇසෙන්නට විය . ඒවා ගණන් නොගෙන මම පෝලිමේ මුළට  වෙන්න ඉන්න වයසක අයෙකට ලං වීමි .

මාමේ මොකෝ මෙතන වෙන්නේ ?

ඇයි  මහත්තයෝ , මෙතැනලු නේ අර අතුරුදහන් වුවන් හොයන කොමිසම දාන්නේ ..

ඒක  තාම පාර්ලිමේන්තුවේ පාස් වෙලාත්  නෑනේ ..මාමාට ෂුවර්ද

අනේ මේ මහත්තයෝ.. පාස් වෙලා නෑ  කියලා මහත්තයට ෂුවර්ද ?

හැහ් ... ඉතින් මාමාගේ කවුරු හරි අතුරුදහන් උනාද , යුද්දේදීද

නැති වෙච්ච කාලේ නම් නිනව්වක් නෑ  මහත්තයෝ, හැබැයි  නැති වෙච්ච කට්ටියක්ම ඉන්නවා 

ඒ කියන්නේ අසු නවයේ වෙන්නැති 

හරියටම නිනව්වක් නෑ  මහත්තයෝ ... හැබැයි මේ රටේ  නීතිය  අතුරුදහන් වෙලා .. රට බලා ගත්ත මුර දේවතාවුන්  ඒ කට්ටියත් ආ ගිය අතක් නෑ .

නීතිය නම් නැති වෙලා නෙමෙයි දිය වෙලා මාමේ .. හැබැයි අර මුර දේවතාවුන් බැරිම තැන නම් බෝට්ටුවක නැගලා ඔස්ට්‍රේලියාවට වත් ගියාද දන්නේ නෑ  


මම තවත් අයෙක් ලඟට ලං වුනෙමි

 අපේ රටේ සරළ  ජනාධිපති තුමාගේ අර ජනවාරි අටවෙනිදා අත්සන් කරපු ඇට්ලස්  චූටි  පෑන  නැතිවෙලා මහත්තයෝ .. ඒ නිසා එතුමාට අර සරළ  ජීවන පැවැත්ම ගෙනියන්න හරි අමාරු වෙලා තියෙනවා..

හැබැයි ඕක නම් පොලිස් ඇන්ට්‍රියක්  දාන්න ඕනේ කේස් එකක්

ඒකත් හැබෑව මහත්තයෝ , අපේ පොලිස් පති තුමා , නීතිය  ඒ පැත්තට මේ පැත්තට නවලා ඕක හොයා ගනියි නේ  

මේ අංකල් තමුසේලට  පිස්සුද ඔය වගේ සිල්ලර කේස් මෙතැන්ට  ගේන්නේ ,(පෝලිමේ පිටිපසින් තරුණයෙක් කතාවට එක්විය ) ...

හරි මල්ලි මොකක්ද හොයන්නේ

මට මේ හම්බුවෙච්ච පොරොන්දු මිටියක් තිබ්බා , යහපාලනේ කියලා ගහපු ෆයිල් එකක්  ඇතුලේ .... ෆයිල් කවරේ එහෙම්ම තියෙනවා , ඇතුලේ තිබ්බ ඒවා  අතුරුදහන්  වෙලානේ 

ඔය මොනවද අයියේ , අර තව කොහෙද කොමිසමක ෆයිල් කන්දක්ම තිබ්බද නැත්ද නැතිවෙලා තියෙන්නේ ..
(පිටිපසින් උන් තරුණියක් කතාවට එක්වූවාය )

හැබැයි කොල්ලෝ පරණ පයිල් වගයක් නම් තියෙන තැනක් ගැන අපේ ජනාධිපති තුමා කිව්වා ..පොඩ්ඩක් අහලා බැලුවානම් නරකද ? ( වයසක කාන්තාවක්ද තම මතය ප්‍රකාශ කළාය )

ඇය  ඉන්පසුව ඇගේ  පැමිණිල්ල ද ඉදිරිපත් කරන්නට විය 

පුතේ අපේ ගෙදර උන්න බළල්  තඩියා ... ලිප ලඟට වෙලා ඉඳලා .. මම තාච්චියේ බැද බැද හිටපු බැඳුම්කර ඔක්කොම ගිලලා ....දැන් ඌත් අතුරුදහන්  

මම නම් හොයන්නේ අර සිවිල් සංවිධාන .. උන් අන්ත්‍රස්ධාන වෙලානේ 

නී මී ..මං  නම් හොයන්නේ ඔය ඔක්කොටම වඩා වැදගත් දෙයක් අනී ..

ඒ මොකක්ද

අපේ රටේ මිනිස්සුන්ගේ මතකය අතුරුදහන් වෙලා වගේ මෙයා ...ජනවාරි අටවෙනිදට වැඩ කලින් දේවල් කට්ටියකට මතක නෑ ... ජනවාරි අටවෙනිදා ඉඳන් අගෝස්තු වෙනකං කිව්ව දේ තව කට්ටියකට මතක නෑ

මේ කට්ටිය මේ අහන්න මම හිතන්නේ ඔය ගොල්ලන්ට මේ කොමිසම ගැන හරි වැටහීමක් නෑ  ..මෙතැන  පැමිණිලි බාර ගන්න යන්නේ අතුරුදහන් වුවන් ගැන

මම පුළුවන් තරමින් තේරුම් කරදීමට සැර සුනෙමි . එහෙත් කිසිවෙක් මා කියූ දෙය පිළිගන්නා බවක් නොපෙනුණි . එහෙත්  පෝලිමේ මැද  හුන් යුවලක් , එතැනින්  ඉවත් ව යනු දුටිමි . 

අන්න දැක්කද අර කට්ටියට තේරුනා

සියල්ලෝම ඔවුන් දෙස බැලුවෝය . කෙසඟ මැදි වියත් පසු කළ  පුරුෂය සමග සිටියේ , හැදිදැඩි ගැහැනියකි . ඔහු ලජ්ජාවෙන් මෙන් බිම බලා ගත්තේය , ඈ  කතාවට මුළ  පිරිය 

... නෑ  මං හිතන්නේ අපි මේ ගැන වරදවා තේරුම් ගත්තේ ....මම මේ මිනිහා ඇදන්  ආවේ මෙතෙන්ට, පත්තරේ ඇඩ්  එක දැකලා ..මමත් යෝජනාවකට කැමති වෙලා මූව බැඳ ගත්තා ..ශික් විතරක් නමට පිරිමි ... ඉතින් පත්තරේ දැන්වීම දැකලා මම ඇදන් ආවා .. හැබැයි දැන්වීම තිබිලා තියෙන්නේ අතුරුදහන් වුවන් සෙවීමේ කොමිසම කියලා , ඒ වුනාට අපේ පත්තරේ මොනවද ගැවිලා නිකන් "වූ" යන්න නිකන් "චූ"  යන්න වගේ පෙනුනේ ... මම හිතුවේ ඒ වගේ ලෙඩවලට බෙහෙත් කරන තැනක් කියලා

20 August 2016

චන්දරේ ගේ තුන් කාලක් ක්‍රියාව හෙවත් නො බිව් සෝඩා බිල

ඔන්න දවසක් එක යට රත්නේ  යාලුවෙක් (මතකනේ යාළුවාව  https://pinchpoints.blogspot.hk/2016/06/blog-post_12.html ) එක්ක සෙට් වෙලා පොඩි  අල්ලාප සල්ලාපයක් ය .  ඒ පෙරදිනයේ රාත්‍රියේ මිතුරු හමුවක් හෙවත් සැට් වීමක් පිළිබඳවයි 

ඒ අඩේ  .චන්දරේ ...ඊයේ වැඩේ නැගලා ගියාලු නේද 

ඔව් ඔව් .. වැඩේ මරුවටම ගියා .. දෙකක්ම   ඉවර කළා කට්ටිය .

 ඔව්   ආරංචියි ...

හැබැයි මේ කොල්ලෝ කියලා ඉන්නවා කිසිම වැඩක් නෑ ... ඒකෙන් තුන්කාලක්ම බිව්වේ මම තනියම ... මුන් කොල්ලොද අප්පා ?

 එතකොට උඹයි තුන් කාලක් ක්‍රියා කළේ ?

එහෙනං 

 මේ සුද්දා තැන තැන කියන්නේ  සෝඩා බිලක් ගෙවන්න තියෙනවාය  ...ඔක්කොම එවුන් මාරු වුනාය .... දැන් මුදලාලි ඒක ගෙවන්න  කවුරු හරි  එකෙක්ව හොයනවාය කියලා ... 

හඃ ... ඒ ඒ ඒවට  නම් මම නෑ ..බිව්ව එවුන්ට උත්තර බඳින්න කියහන් සුද්දාටයි උගේ මුදලාලිටයි 

ඒ කියන්නේ උඹ නීට් අරක්කු විතරද බිව්වේ 

පිස්සුද බං , අපි එහෙම බේබද්දෝයෑ ? ..  අපි  සිස්ට සම්පන්න විදියට ජෙන්ටල් මෑන්ස් ලා වගේ සෝඩා අඟලක් දා ගෙන , අයිස් කැට දෙකක් දා ගෙන පිළිවෙලකට බිව්වේ .

 සෝඩා විතරක් බිව්ව එවුන් හිටියද ?

පි පි පිස්සුද මලේ , ඒ වගේ අපරාධ කාරයෝ අපි සැට්  කර ගන්නවද   මේ වගේ මානුෂික මෙහෙයුම් වලට 

එතකොට සමානුපාතිකව බලපුවහම ,  උඹ  අරක්කු වලින් තුන් කාලකට වග කිව්වානම් , සෝඩා වලින් වැඩි හරිය බීලා තියෙන්නෙත් උඹ නේ 

හැහ් ... එ එ  එහෙම කොහොමද ...ඒ අර ඈත කවුද බං  එන්නේ 

කෝ , කවුරුවත් ....ඒ උඹ කොහේද  ඔය ශේප් වෙලා යන්නේ ?

 පලි :

පසු  ගිය දිනෙක , අයෙක් යුද්ධය නිමා කිරීමේ ගෞරවය තුන්කාලක්ම තම පිඟානට බෙදා ගත්තෝය . මෙහෙම ගියොත් ප්‍රභාකරනුත් ඊට ගෞරවය ඉල්ලා සිටිනු ඇත . දුක යනු මෙවැනි කට මැත දොඩවන්නන් දෙඩ වීම නොව , ඒ දෙඩ වීම් ප්‍රචාරය කිරීමය