14 April 2012

හැoගිමුත්තම්


පෙර කතාව  : 

පහල ගෙදර උක්කුන් අයියා ගිය සතියේ යම් දිනයක අවුරුද්දට ගමේ ආවේය . ආගිය තොරතුරු කතාකරමින් සිට හවස , වතුර ටිකක් නා ගන්නට ගොරක ගහ යට පොදු ලිඳට  ගියේය. 

ඒ ඔහු ගැන අසන්නට ලැබුන අවසන් වතාවයි  . ඉන් පසු ඔහු ගැන ආරංචියක් නැතිවිය .  දින තුනක් තිස්සේ මුළු ගමම ඔහුව සෙවිය . ලිංවල , ලඳු  කැලාවේ , වැව තාවුල්ලේ මෙන්ම අහල පහල  පොලිසි, ඉස්පිරිතාල  සහ පන්සල්වල වලද සොයා බැලිනි 


සුදු මාමා , දන්නා අඳුරන මහත්තයෙකුට කියූ හෙයින් , පළාතේ ශ්‍රී ලංකා පොලොසියෙන්ද,   වෙනදාට මාර ගහකට මුවාවී , යකාගේ වංගුව මුර කරන , කොස්තාපල් වරු දෙදෙනෙක්ද  ඒවා තිබුණි. සැවොම දින තුනක් තිස්සේ ඔහුව සෙවිය , නමුත් හමු වුයේ නැත . 
 
  

අද උදේ ,ලිඳ පිටිපස්සේ  වැටකෙයියා පඳුරකට මුවා වී සිටි කිසිවෙකු දැක කමලාවති සබන් පිටින්ම, බාල්දියද 
ලිඳට අතහැර  හූ කියා ගෙන දිව ගියාය .
හැoගිමුත්තම් නිමාවිය . දැන් ගමම මෙතනය. මෙතැන් සිට දිග හැරෙන්නේ රැස් වූ විවිධ අයගේ  ප්‍රශ්න කිරීම් සහ අර්ථකතනයන්ය . 
  
විදානේ මාමා: " කොහෙද යකෝ ගිහින් හිටියේ අපි මේ බය වෙලා හිටියේ , අපි හැමෝම හෙව්වා " 
  
රන්ජි : අපි හිතුවේ සතා සර්පයෙක්වත් කාලද කියලා, අරහේ ගෑනියි ළමයිනුයි අඩා ගත්ත ගමන් , යන මල
           දානෙක කියලා පලයන්කෝ .
 
  
සිරිල් : කමලාවතී දිව්වා දිවිල්ලක් , හුරේ  රන් , සබන් පිටින්, රෙද්ද අතේ  .....හොහ් හොහ් 
  
මාග්‍රට් : අල්ලපු ගමේ සොපියගේ දුවත් නැතිවෙලාලු , එකී කියා කියා යනවා උඹත් එක්ක පැනල ගිහිල්ලද
           දන්නේ නෑ කියලා ., 


සිරිල් : මාග්‍රට් අක්කේ,  අනේ පැනල යන්නම බඩුව එකී . මගෙත් ඇඟේ එල්ලෙන්න ආවා , අපි අහුවෙයි
           ඕවාට.
 
  
රන්ජි : උක්කුන් අයියා ,  සුදු මාමා දන්න මහත්තයෙකුට කියලා පොලොසියෙනුත් ආවා. 
  
සුරංග / හිච්චි පුතා (ගෙදරට) /  මාග්‍රට් ගේ  
පස්  හැවිරිදි පුතු : 
මාමේ , අපේ අක්ක කිව්වා මාම බයි කන් නැතුව බිල්ලෝ අරන් ගිහින් කියලා කරෝල වාඩියට , ඇත්තද ?


විදානේ මාමා: ඇත්ත කියපන් උඹ ගියා නේද ඇඩ්ඩින් ගේ පොට්‌ එක පැත්තේ ...ඕකා ඔය ජරාවට ඇසිඩුත්
                      දානවා...උඹට සිහිය නැති වෙන්න ඇති 


මේ කිසිවකට උක්කුන් කිසිවක් කිවේ නැත . අහිංසක ලෙස සිනාසුනා පමණි . ඉන් පසු ඔහු නැගිට සරමේ ඇලුණු තුත්තිරි ගලවමින් නිවස බලා පිය නැගුවේය .ඔහුගේ සරමේ මඩ පැල්ලම,  කතාවේ නොකියූ පැත්තක් ඉඟි කළේය .
  

පසු කතාව : 

උක්කුන් නැවතී සිටින බෝඩිමේ ඇන්ටිද , ඇය දන්න කොලඹ ඒ එස් පී මහතෙකුට මෙය කියා තිබුණි. ඇය ආඩම්බරෙන් කීවේ උක්කුන් සොයා ගැනීමට හැකි වූයේ ඒ නිසා කියාය . 

සුදු මාමා කීවේ , ඔහුගේ මැදිහත් වීම නැතිනම් , වෙන කාට කිව්වත් , උක්කුන් තවමත් සොයා ගැනීමට බැරිවෙන බවය . 

උක්කුන්ගේ බිරිද , ඇය ගැට ගැසූ පඬුරක් ගැනද , ඉටු කිරීමට ඇති බාරයක් ගැනද නෙක් වර කීවාය . 
එනමුදු  විටක "කව්ද දන්නේ කොයි ගුබ්බෑයමක ගිහින් හිටියද කියලා, අනික අර බෝඩිමේ ගෑනිට 
මොකක්ද ඔච්චර තියෙන  කැක්කුම  " කියා ඇය ලයිසාට කියා තිබුණි . 

විදානේ මාමා පසු දිනයක , හන්දියේ බඩා මුදලාලිගේ කඩයේදී , කහට කෝප්පයක් බොන ගමන් පත්තරේ ලිපියක් පෙන්වා කිවේ , අතුරුදහන් වීම ලේසි පහසු වැඩක් නොවන බවත් , කිසිවෙක් එය සැහැල්ලුවෙන් නොගත යුතු බවත්ය .

2 comments:

Have commented