විශ්වයේ මධ්‍ය ලක්‍ෂය

මගේ උපකරණ පුවරුවේ තිරයේ තවත් යානාවක සේයාවක් පලවෙනි වරට දිස්වන විට මම සිටියේ මා ගමන පටන් ගත් තැනින් බොහෝ දුරිනි .

 "ආලෝක වර්ෂ 7341ක් ""
 "ඩැනි ", මාගේ සහයට සිටින , PSAD V6.3 වර්ගයේ  කුඩා පෞද්ගලික අභ්යවාකාශ සහයක ඩ්රොයිඩ් (personal space assistant droid ) , මාගේ මතකයට දත්ත එක් කරයි .
( මාගේ ඉවෙසිමේ සීමාව නිරතුරුවම ඉක්මවන දේ ලයිස්තුවේ ,මේ බෙලෙක්ක කුනුබක්කිය මගේ සිතිවිලි කියවා ඊට උගේ සත පහ එකතු කිරීම ඇත්තේ ඉහලින්මය .)

යානය ගැන වැඩි දුර විස්තර සොයාගතිමි . මා මෙන්ම , ඇය ද සිටියේ , එක පුද්ගල යානයක හිරවී , නිමක් නොපෙනෙන විශ්වයේ ඉබේ ඇදෙමිනි .
අප දෙදෙනාම සොයමින් සිටියේ එකම දෙයකි .

"දෙයක් නොවේ හරියටමනම් "තැනකි" "   නැවතත් ඩැනී ...
ඔව් තැනකි. මධ්‍ය ලක්ෂය,  විශ්වයේ...අපේ වෙනස් තරු සිතියම් වලට අනුව එය තිබුනේ දෙතැනකය . වෙනස් චක්‍රාවාට දෙකකය ....
මොරටුව අන්තර්ජාතික අභ්යවකාශ විශ්ව විද්යාලයේ මහාචාර්ය සමුද්‍රගුප්තගේ තරු සටහනට අනුව , එය තිබ්බේ ඈත චක්‍රාවාටයක  කළු කුහර දෙකක් මැදය ....මා යමින් සිටියේ එතැනටය .ඒ ඔහුගේ අනුමානය ඔප්පු කිරීමටය .
එක අතකට, කොටින්ම කියනවනං, මම නිකන්ම නිකන් කඩේ යන්නෙක්මි .

වෙනත් ආයතනයක වෙනස් අයෙකුගේ න්‍යාය  වෙනුවෙන් වුවද ,ඇයත් එසේමය .
කෙසේ හෝ අපි අහම්බෙන් හෝ දෙවයේ හැටියට ,මේ සක්වලේදී හමුවුණෙමු ...

"මේක මගුල් සක්වලක් ..."

"ඩැනී, උඹ ව මම කුණුබක්කියට තියලා පාස්සනවා.. උඹේ බෙලෙක් අම්මට ..."

"එදා කිව්වා වගේ ....අම්මට ගැල්වනයිස් කරන්න ?..."

"කිව්වා කියල හිතා ගනින් ටකරමා "

ඇත්ත ,මේක මගුල් සක්වලක් තමයි .
අපි කතා කළා . මුලින් මුලින් තම තමන්ගේ තරු සැළසුම හරි යයි ඔප්පු කරන්න පටන් ගත්ත කතා බහ , පස්සේ වෙන දේවල් වලට පැතිරුණා . සමහර දවස් වල අපි දැඟිලි පටලාගෙන අනන්ත තරු යාය දිහා ඔහේ බලාගෙන හිටියා . ප්‍රියවිප්පයෝගයට  බයෙන්, මේ තරු මඬලේ ම පාවුනු අපි , අපේ mission එක , මුලින් මුලින් ඕනෑකමින්ම අමතක කළා .

"පස්සේ ඉබේම අමතක උනා "....(අම්මප මූට ...)

පස්සේ , අපිට තේරෙන්න ගත්තා , අපි කාලාන්තරයක් තිස්සේ සෙවූ විශ්වයේ මධ්‍ය  ලක්ෂය ඇත්තේ,  අපි දෙදෙනාගේම තරු සිතියම් වලින් ඔබ්බෙන්වූ තැනක  බව ......
අපි දෙන්නම Mission එක abort කලේ ඒ නිසා වෙන්න ඇති
.
.
.
.
.

" මේ බලන්න කෙල්ල හීනෙන් හිනා වෙනවා ...පුංචි සුරංගනාවියක් වගේ "...
දියණිය තවමත් ඇගේ දෝතේය ... බිලිඳු නළලත වැටුණු අකීකරු කෙහෙ රැල්ලක්, ඇය  සෙමින් සකසන්නිය .
මම නැඹුරු වී ලපටි කොපුල සිඹ ගනිමි ...කිරි සුවඳක් මා නහය ඔස්සේ ගලා විත් සිතට පිරේ ....


විශ්වයේ මධ්‍ය ලක්ෂය ..................

පලි
පසු ගිය දිනෙක ඇසුණු දෙයක් මසිතේ සනිටුහන් වී ඇත . බොහෝ දෙනා සිතන්නේ විශ්වයම කරකැවෙන්නේ තමන් වටා බවය . මා අදහන ආගමේ හැටියට එය තරමක් දුරට නිරවද්ය වේ. මුළු සසරම මමත්වය කේන්ද්රකොට ගෙන බිහිවේ . අනෙක් අතට විස්ථාපනය වන විශ්වයක , කේන්ද්රය කුමන අරුතක් සපයයිද ....නමුත් මා දියණිය උපන් දින පටන් මා උගත් පාඩමක් නම් ඇත්තේය ..එනම් ,මුළු හදින්ම ...අන් කවර දෙයකටත් වඩා , ඇතැම්විට තමන්ටත් වැඩියෙන්, කෙනෙකුට ආදරය කළ හැකි බවය .