හිර සපත්තු න්‍යාය සහ සුප් නූඩ්ල්ස් න්‍යාය

පහු ගිය දොහේ  සිතේ සතුට ගැන ලියෙවුණු ලිපි වැඩියෙන් මම කියවන්නට වුනෙමි  . (අර දවසක කිව්වා වගේ , ගිලිලා ගිලිලා කකුල් දිය පතුලේ ගෑවෙන්න වගේ  ගන්නකොට , මේ වගේ දේවල් ගැන හිත යොමු වෙනවා වැඩියි දෝ කියලත් හිතෙනවා  .)
සතුට ලැබෙන්නේ කෙසේද , එය රඳවා නොපවතින්නේ ඇයි ?  දැනෙන දුක් තිත්ත පසු ව  මිහිරි මතකයන්   වීම , ලද දෙයින් නොසැහෙන අපේ මනස , වැනි දේ  ඒ අතරේ තිබුණි .

මේ සිතුවිලි පථය ඔස්සේම මා සිත යන කල , ටික කලක් තිස්සේ පොලිෂ් කල  න්‍යායන් දෙකක් මට හමුවුනි  . 
මෙහි අයිතිය , අන් අය සතු බැවින්  මා ඒවා මගේ නමින් නම් කිරීමෙන් වැලකෙමි . නැත්නම් "JP ගේ  X වෙනි න්‍යාය " කියා දමන්නට තිබුණි . ( එක න්‍යායක් නම් පෙර පොස්ට් එකකෙනුත්  යන්තම් හැදින්වුනා )

හිර සපත්තු න්‍යාය  (හෙවත් දුක නැති තැන සැප කොහෙද රංජනී )

ඒ කාලේ  අපි ආතක් පාතක් නැතුව හිටපු දවස් . මාසේ පඩිය ගිණුමට එනවා, යනවා . අපි රෑ  වෙනකන් වැඩ . අපි කොටන් අදිනවා , පෙරහරේ යන්න කට්ටිය නැව්  පිටින් එනවා .  

ඔහු ග්‍රවිඳු . ඒක  අන්වර්ථ නාමයක් .  අපි දෙන්නම කැමති ගෝඩ්  ෆාදර් චිත්‍රපටය ඔස්සේ ඇදුන කතාවක් ...."මටත් හිතයි ඉතාලි මාෆියා ලොක්කෙක් වගේ නමක් දමා ගන්න ...ග්‍රවාණෝ  වගේ " කියන තැනකට ඇවිල්ලා ....හෙළ හවුල ගැනත් කතා කරලා ...ග්‍රවාණෝ ලොප් කරලා , ග්‍රවිඳු  කලේ මම ...
හරි ..කැලේ පැන්න ඇති. නැවතත් කතාවට . 

සිංහලෙන් කතා නොකෙරුනම වගේ ආයතනයක , සිංහලෙන් හිතපු මට ,ඒ දවස් වල කල ව්‍යාපෘතියක් නිසා ඔහු හමුවුනා  .  අර ගොළු මඩමක හිටපු කතා කරන්න පුළුවන් එකෙකුට,  තව කතා කරන එකෙක් හම්බුවෙලා වගේ . අපි බොහෝ දේ ගැන කතා කළා . නන්දා මාලිනීගේ අමරදෙවගේ සින්දු ගැන, (ඔහුට ගයන්නත් පුළුවන් . මට නම් ඉතින් සින්දු කියන්න විතරයි හැකි ).  රටේ දේශපාලනය ගැන ,  සංස්කෘතිය ගැන , වෘත්තීය සමිති වැඩ ගැන   .කතා කරලා බොහෝ විට  අවසානයේ "මචo ස්වීප් එකක්වත් ඇදෙනවනම්" කියලා ...අපි අපේ හිත්  එක්ක නිහඬ වුනා 

දවසක් ( ඇත්තටම නම් පඩි දවසට පහුවෙනිදා)  අපි යනවා කොටුවේ බාටා  එකට සපත්තු ගන්න . 

ග්‍රවිඳු , බොහොම අමාරුවෙන් සපත්තු කුට්ටමක් දානවා . 

"සර් එක සයිස් එකක් ලොකුවට ගේන්නද?" විකුණන කොලුවට මේ දුක තව දරා ගන්න බෑ .

" නෑ  නෑ , මේක හරි සයිස් එක "  කකුල අඹර අඹර , ඔහු වම් කකුල දා ගත්තා කොහොම හරි  .

"මචන් , ලොකු සයිස් එකක් ගනින් කෝ , ඕක පොඩියි  වගේ නේ , කොහොමද දවසම ඇඳ ගෙන ඉන්නේ "

 මගෙත් දුක බලා ඉඳීමේ සීමාව පැනලා .

" පලයන් බන් යන්න, මේක තමයි සයිස් එක , උඹට තේරෙන්නේ නෑ " ඔහු මුදල් ගෙවලා සපත්තු කුට්ටම ගත්තා  . ඉතුරු සල්ලි  සත දහය වෙනුවට ටොපියක් හම්බු උනා .

අපි එන ගමන් මම ඇහුවේ, මට නොතේරේ යැයි කියූ දේ ගැන .

"මචං  මට කිසිම ජොබ් සැටිස්ෆැක්ශන් එකකුත් නෑ . වටේටම නය වෙලා . ගෙදර ගියාම ගෑනිත් ඇමිනෙන්න ගන්නවා . මට ඉතින් තියන එකම සැපත , මුළු දවසම මේ හිර සපත්තු දෙකේ කකුල් හිර කරගෙන ඉඳල හවසට එක ගලවන එක . එතකොට නිවන් ගියා වගේ බන් ,  හැමදාම හවසට ඒ දැනෙන නිවනට මං  කැමතියි " 

එතනින් එහාට මොනවා කියන්නද ?

සුප් නූඩ්ල්ස් න්‍යාය (හෙවත් පස්සේ පස්සේ පුරුදු වීම )  

ඉස්සර මෙහෙ ආපු දවස් වල මට සුප් නුඩ්ල් පුසුඹ ඉවසන්න බෑ . දන්නවනේ සුප් නුඩ්ල්ස්? අර මැගී  වගේ ..

ඒ මදිවට මේ අය  නූඩ්ල්ස් කාලා අර සුප් එක "බ්රුස් "  ගාලා බොන කොට , මගේ නම් දවල් කෑම එක ආපහු පිටතට  එන්න හදනවා .

යාළුවන්ට කතා කරපුවහම දුරකතනයෙන් , අලුත් රටේ  , වැඩපොළේ , වෙනස් කම් කියවන එක ඉතින් සුපුරුදු දෙයක් නේ  මුල දවස් වල . 

" ඇති නේ ඕහේ ඉටි කිරිස් කෑලි ..සුදුවට සුදුවේ ..එක්සේට්‍රා එක්සේට්‍රා "  මේ නිතර මතු උන ප්‍රස්නයක් 

. "මෙහෙමයි වැඩේ,  මේ ගෑනු සුදු නම් තමයි , හැබැයි ඉතින් ගම ගාල්ල , අර මොකක්ද එකයි අනිකයි 
ලෑල්ල ..." එහෙම  කිව්වේ ඇත්තටම. ඉඟ සුඟ විතරක් නෙමෙයි අනිත් ඔක්කොම ගතින හැක එක මිටින . පොත්ත පැහැපත් උනාට දෙවරක් හැරිලා බැලුනේ නෑ ....

 පහු පහු වෙනකොට,  දේශීය කාර්යාල මිතුරන් එක්ක දේශීය ආහාර කන්න ගියා. චොප් ස්ටික්ස් පාවිච්චියත් ටිකෙන් ටික පුරුදු උනා . මම තවම නුඩ්ල්ස් සුප් නම්  බොන්නේ නෑ . හැබැයි ඒක බොන එකෙක් ළඟ ඉන්න කොට එච්චරම අප්පිරියාවක් නෑ .

පාරේ යනකොට , දැන් නම් හිටපු ගමන් හැරිලත් බැලෙනවා .

හැම දේම එහෙම  නේ