අන්දරේ බළකාය

එකෝමත් එක කාලේක , අපි ඉස්කෝලේ යන දවස් වල , පින්තුර කොළ කියලා ජාතියක් තිබුනා .

A3 ප්‍රමාණයේ කොලේක , විවිධ තේමා ඔස්සේ පෙළ ගැහුනු අඟල් දෙකේ දෙකේ කොටු වල  එළවලු , පලතුරු , ජාතික කොඩි , සත්තු , තේමාවේ හැටියට පෙළ ගැසුනා . මේ පින්තුර කොළවලට බාල පන්තිවල ගුරුවරුන් බෙහෙවින් ප්‍රිය කරන්නට ඇති බව මට සිතෙන්නේ හැම දාම වගේ මොකක් හරි කොලයක් අරන් එන්නට කියා ඔවුන් කියූ බව සිහිවෙන විටයි .

දෙකේ පන්තියේ එක දවසක්  , අපට රැගෙන ඒමට කීවේ  ජාතික වීරයන් ගේ පින්තූර .
දුරකථන , පුද්ගලික වාහන නොතිබුණු ඒ කාලේ , වැඩ ඇරිලා බස් එකේ හිරවෙලා ආපු අපේ අම්මා , හැරෙන පයින් ගිහින් හුළංගේ කඩෙන් ඔය ශීට් එකක් අරගෙන ආවා .

පුරන් අප්පු , කැප්පෙටිපොළ  , වාරියපොළහිමි ගෙන් මුල් කොටු පිරුණු කොලේ  , මැදට වෙන්න පොන්නම්බලම් අරුනාචලම් , පොන්නම්බලම් රාමනාදන්, ටී  බී ජයා  ලාගෙන් සමන්විත වුනා . අගට යනකොට , ටේල් කෝට්  එකක් ඇඳලා  ගිහින් සිංහ කොඩිය උස්සපු ජාතියේ පියායි  . කලිසම උඩින් සරම දාගත්ත බණ්ඩාරනායක උන්නැහෙයිත් හිනා වෙලා උන්නා . 

(අර නෝනිස් ලොක්කා  දක්වපු නියමය හා සනාථ කිරීමට අනුවම බලපුවහම , ප්‍රජාතාන්ත්‍රික රටක ඕන පින්තුරයක් ඕනේ කොලේක ගහන්න පුළුවන්නේ, වරදක් නෑ  )

මෙන්න බොලේ ඊට පේළියකට උඩින් අන්දරේ !

පුංචි අපේ මොළවලට,   බෝතලේ වලව්වේ හාමුයි , හොරගොල්ලේ සොලොමන් වෙස්ට් රිජ්වේ ඩයස් බණ්ඩාරනායක හාමුයි ජාතික වීරයෝ වෙන්නේ කොහොමද කියලා සංකාවක්  ඇති නොවුනාට ,  මේ පින්තුර කොලයේ පින්තුරය ඇතුළු කර ගැනීමට අන්දරේ ගේ සුදුසුකම් ගැන අපි සැවොටම වුයේ සැකයක් . 

( ප්‍රජාතාන්ත්‍රික රටක එහෙම සැක  කරන්නත් අපිට පුළුවන්නේ )

අපේ පන්ති බාර චන්ද්‍රසේන මිස් , මේ පැනයෙන් බේරිලා , තම ගෞරවය රැක  ගන්න මහත් වෙහෙසක් දරුවා . අන්දරේ කියන්නේ වාසල කවටයා බවත් , රජතුමාට ඇතැම් විට සරදමින් මෙන් විවිධ දේ කියා ඔහුගේ විවිධ තීරණ වෙනස් කළ  හැක්කේ ඔහුට බවත් , තර්කයක් ගොඩනැගීමට ඇය  උත්සාහ කලත් . ඒ පන්තියේ හුන් යස්ස පැටව්  එය පිලි නොගත් බැවින් , ඒ පාඩම අවසන් වුයේ , අප සියලු දෙනා  කන් දෙක අල්ලා  ගෙන පුටු උඩ  සිටවීමෙන්  . ( ප්‍රජාතාන්ත්‍රික රටක එහෙම කරන්නත් ඔට්ටුයි නේ )

කාලයාගේ ඇවැමෙන් , යමක් කමක් තේරෙන විට මගේ ආකල්ප වෙනස් වෙලා . අන්දරේ කියන්නේ මහා වීරයෙක් තමයි කියලා මට දැන් වැටහේ . කොටින්ම කියනවානම් රජතුමා රකින්න,  ලඟින්ම ඉන්න මහා වීර (හෝව් හෝව් ..අර මහා වීර නෙමෙයි හරිද  )  සේනාංකයක් . රජතුමාට උත්තර දෙන්න බැරි ප්‍රශ්ණ  එහෙම ආපුවම , සැනෙක ඔවුන් පෙරට විත් මහා ගුප්ත ශාස්ත්‍රයක් වන  අමනෝඥ හාස්‍යප්‍රොක්‍රම සාස්තරෙන් වැඩේ ගොඩ දා ගන්නවා .

ඔන්න සැක නම් , හොයලා බලන්න වීඩියෝව  , මේ සාස්තරේ අති සූරයෙක් වන ගම්පොල දි මු ගුරුන්නාන්සේ  මේ ලඟදි දවසක් බලු කෑම  ප්‍රශ්නයක් අරබයා , තම ගුප්ත සාස්තරේන්  සිල්ප  දක්වන අපූරුව .

පලි :
මට අපි ගැන දුක හිතුනා